– I fjor prøvde vi å legge til rette for at fleire barn og familiar kunne vere med. Barneløypa var ein suksess, og vi ønskjer å fortsette med det i år. Alle som deltar i barneløype får medalje, fortel Kenneth Vedvik frå arrangør Eid IL Ski.
Nytt i år
Nytt av året er aktivitetar for barn på Eid stadion midt på dagen.
– Her kan dei få prøve eit variert utval aktivitetar som hesteskokasting, riding, sumobryting, sekkehopp og springe kupert løype på idealtid, opplyser Vedvik.
Lokal favoritt
I konkurranseklassa er Trym Lødøen, Haugen IL, blant dei største favorittane.
– Han vann herreklassa i 2022. I kvinneklassa var det Irene Svidal som vann i fjor. Ho vil nok vere heilt i toppen også i år., meiner Vedvik.
Rekord for herrar har Thorbjørn Ludvigsen frå Varegg IL. Han kom seg opp på toppen på 33.37 i 2019.
– Det er heilt utruleg fort, meiner Vedvik, som let seg imponere.
Karoline Holsen Kyte sin rekord i dameklassa kom i 2017 med tida 38.44.
– Begge rekordane er svært vanskelege å slå. Både Ludvigsen og Kyte er blant dei beste motbakkeløparane i Noreg, fortel Vedvik.
Årets utgåve av Trollenykjen Opp er den 12. i rekka.