I Nordfjord er det mange tilbod for å ha ein aktiv sommar.
– Fleire yngre har begynt med golf siste åra, konstaterer Stian Aaland, som jobbar ved Chatlet Sport 1 Nordfjordeid. På sportsbutikken ser dei klart kva som er mest populært og har størst interesse av sports- og friluftsutstyr.
Åra pandemien herja gjorde at fleire fann turen ut i fjell og mark.
– Det er mange som har fått utforska fjellheimen, og det har eg sjølv gjort. Etter at Opptur-boka for Stad kom i fjor har fleire fått auga opp for fjella på Stadlandet og i Selje. Det er veldig mange fine turar dit. Elles er det flotte turmål i alle bygder i heile Stad. Det er litt av ein luksus, seier Aaland.
Det er flotte turmål i alle bygder i heile Stad. Det er litt av ein luksus.
Padeltennis
For to år sidan kom to splitter nye padeltennisbaner ved Eid vidaregåande skule – og var dei første i Vestland. Etter det har interessa skote fart. Dette er ein idrett som veks og som har ein eksplosiv auke i heile landet.
– Elles håper vi på sol og sommar og meir bading, ettersom sommaren var så regnfylt som den var i fjor, smiler Aaland.
Vi håper på sol og sommar og meir bading, ettersom sommaren var så regnfylt som den var i fjor.
Mykje å velje i
Det er mykje å velje i om du vil ha ein aktiv sommar – enten du vil prøve deg med klatring eller spele golf – slike type ting der du sjølv kan bestemme tidspunkt og når du vil vere aktiv.
I Stad kommune er det to nihols golfbaner – både Stokkenes golfpark på Nordfjordeid og i Selje.
Idyllisk golfbane ved lakseelv
Nordfjord Golfklubb på Stokkenes tar imot turistar og leiger ut utstyr.
Bana er relativt kort på tre kilometer, men er likevel utfordrande og har naturlege terrassar for kvart hol.
Alle som vil kan kome og slå ballar på driving rangen, då kjøper ein berre ei bøtte med ballar. Utstyr elles kan ein låne. Om du derimot skal på bana og spele golf, så må du ha kurs.