– Det vi har sett tidlegare år er jo at den største heimfarten er 1. påskedag. Det vil fordele seg på første og andre dag, seier trafikkoperatør Tone Sorken i Vegtrafikksentralen aust til NTB.
Det same er inntrykket frå dei andre trafikkoperatørane NTB har snakka med. Det er særleg på europavegar og riksvegar inn mot storbyane ein forventar ekstra trykk. Her er strekningane vegtrafikksentralane har peika ut:
* E6 frå Lillehammer mot Oslo, E16 frå Hønefoss over Sollihøgda og E18 frå Drammen mot Oslo
* Vegtrafikksentralen Nord ventar ikkje store kødanningar i distriktet
* Hovudinnfartsårane mot Trondheim, pluss E14 mot Stjørdal
* E16 frå Voss i retning Trengereid
* Fjellovergangar som Haukelifjell
Det er venta forholdsvis gode vêrforhold i mesteparten av landet. Beskjeden frå vegtrafikksentralane til trafikantane er klar:
– Sjekk vêr- og føreforhold. Følg med på nyheitene, og ta det med ro. Du kjem heim, seier trafikkoperatør Erlend Nilsen i Vegtrafikksentralen midt.
– Pass på at du har full tank eller batteri, tilpass farten til forholda, og ver rett skodd, seier Kjetil Gjøn i Vegtrafikksentralen vest.
– Jo tidlegare du reiser, jo betre, seier Sorken.
(©NPK)