Ny kartlegging syner kritiske behov for vegforsterkingstiltak i Vestland

Slaghol, djupe hjulspor, sprekkar og vegkantar som sig ut er kjente syn langs fylkesvegane i Vestland. Ei ny kartlegging frå fylkeskommunen syner at det er kritisk med forsterkingstiltak på om lag 20 prosent av fylkesvegane.

Det går fram av ei pressemelding frå Vestland fylkeskommune.

Rapporten «Kunnskapsgrunnlag for forsterkingsbehov på fylkesvegnettet» vart lagt fram for fylkesutvalet i Vestland 2. mai. Her er det gjort levetidsanalyse på dekke og bereemnemålingar på 850 kilometer av fylkesvegane i Vestland, om lag 20 prosent av fylkesvegnettet.

Om lag 170 kilometer av dei undersøkte vegane har eit kritisk behov for forsterkingstiltak for å få lengre levetid på dekke og betre bereevne. Dei kartlagde vegane blir rekna som representative for resten av fylkesvegnettet i Vestland, og grovt rekna vil det koste om lag fire milliardar kroner å gjere dei mest naudsynte forsterkingstiltaka på dei om lag 5600 kilometrane med fylkesveg.