Med torsdagens heimesiger på Eid stadion kappa Eid ned på forspranget Skavøypoll har på tabellen. Før Vågsøy-laget skal møte Førde 2 på bortebane søndag, er det to poeng som skiljer laga.
– For at vi skal ta seriegull må Skavøypoll tape poeng. Dersom dei klarar å halde tabelltoppen gjennom heile hausten er det berre å ta av seg hatten, seier Eid-trenar Bjørn Totland.
Straffebom og stolpeskot
Det gjekk lenge før Eid klarte å score på grøntrøyene frå Kaupanger, men i siste halvdel av andre omgang losna det. På litt over 20 minutt sette Eid inn fire scoringar, og tok til slutt ein trygg siger.
– I førre kamp mot Tornado Måløy var vi best før pause. No var det omvendt. Vi sleit med presisjonen i første omgang, der vi hadde både straffebom og to stolpeskot, seier Bjørn Totland.
Fekk inn friske bein
Han er godt fornøgd med at laget heva prestasjonen etter kvilen.
– Då går det fortare og meir presist. I første omgang prøvde Kaupanger å spele fotball, noko dei til tider lykkast godt med, men i andre omgang la dei seg veldig lågt i bana og klarerte. Det går ikkje i 45 minutt mot oss, seier Totland.
Eid gjorde til saman seks byter etter pause, noko Totland meiner hadde positiv innverknad.
– Det var positivt å få inn friske bein, og til slutt fekk vi hol på byllen, seier Bjørn Totland.
Simen Lefdal var sjuk og var derfor ikkje i kamptroppen til Eid. Sindre Hafsås var ute med skade. Neste heimekamp for Eid er komande fredag mot Høyang. Der må Sebastian Grøttå stå over med karantene, etter å ha fått sitt tredje gule kort for sesongen mot Kaupanger.
Kampfakta
4. divisjon menn, Eid Stadion
Eid - Kaupanger 4-0 (0-0)
Mål:
1-0: Kristian Lefdal (66)
2-0: Vebjørn Høynes (67)
3-0: Henning Haugen (73)
4-0: Joachim Joensen (88)
Dommar: Tor Henning Mardal, Fjøra
Assistentdommarar: Steinar Hole, Jølster og Rune Haugland, Haugen
Gult kort: Sebastian Grøttå, Eid
Eid: Sander Torheim Frislid, Sebastian Grøttå (87: Stijn van Oorschot 87), Adrian Hagen Henden, Henning Haugen , Håvard Holmøyvik , Marius Henriksen (74: Daniel Myklebust), Kristian Årskog (46: Muktar Ferej Yassin), Vebjørn Høynes (81: Joachim Joensen), Johannes Myklebust (46: Steffen Glosvik), Daniel Haus (63: Bjørn Totland), Kristian Lefdal
Tabell 4. divisjon
Skavøypoll 13 12 1 0 44 - 15 37
Eid 14 11 2 1 71 - 17 35
Førde2 13 10 0 3 50 - 24 30
Høyang 13 7 2 4 43 - 23 23
Vik 13 6 1 6 33 - 29 19
Dale 13 6 1 6 33 - 33 19
Bremanger 13 5 1 7 23 - 36 16
Tornado Måløy 13 4 2 7 30 - 36 14
Kaupanger 14 3 2 9 19 - 32 11
Gaular 13 3 2 8 23 - 47 11
Sandane 13 3 1 9 11 - 29 10
Fjøra2/SIL3 13 1 1 11 13 - 72 4