For 36. gong vert Eidamessa arrangert tre dagar – frå 15.–17. september.
– Her vert det aktivitetar for små og store. Det vert sett opp scene ved Betania, og laurdag vil her vere underhaldning frå scena i sentrum, fortel Gro Gjerdevik, leiar i Eid Handel og Reidun Sunde, ein av butikkdrivarane i Nordfjordeid sentrum.
På Hamna vert det klatring for store og små. På Kulturhuset Gamlebanken er det salsutstilling med Shaban Bamerni.
Simulator med gravemaskin
Under Eidamessa kan du køyre redningsbil, gravemaskin og traktor i mindre storleikar, og born får køyre med redningsbil frå Stårheim Bilverkstad.
– Ein kan også prøve gravemaskin-simulator med Naustdal maskin, fortel Gjerdevik.
Laurdag er det Løp for meg gjennom Eidsgata – til inntekt for Barnekreftforeningen.
Det vert også bilutstilling ved Moengården. I Eidsgata vert det gratis ballongdyr og overraskingar til borna. På Alti Nordfjord vert det ansiktsmåling for den som vil det.
Fleire konsertar
– Laurdag vert det konsert med dei flinke kulturskuleelevane våre. Også Opera Nordfjord underheld på scena, fortel dei.
Og så kjem Pysjheltane!
– Det er eit kjempekjekt besøk, og er heltar for mange born. To gongar får ein helse på Pysjheltane og får ta bilde saman med dei. Det er berre å stille seg i kø, oppfordrar Gjerdevik.
Bjørn Engelbrektsson vil deretter underhalde på sentrumsscena på dagtid, i tillegg til at han spelar på Magnifikk både fredag og laurdag kveld.
– Det er med andre ord gode sjansar for deg som vil lette på dansefoten, oppfordrar dei.
Laurdag er det haustfest på Badstuplassen med Grøn integrering. Under Eidamessa er det også konsert med Kamilla med K frå The Voice.
Søndag vert det også motevisning med siste nytt frå butikkane. Det skjer på Sentrumscena.
Du har også moglegheit til å prøve riding i sentrum ved Eid ride- og køyreklubb. Ved Sundehjørnet vert det Cars & Co, før Vindfylla Spelemannslag er klare på Sentrumscena.
Litt for alle
– Under Eidamessa vil det ikkje minst vere kjekt med handel og mange gode tilbod. Vi har også leigd Betania, og der vil det vere mange handverksdamer heile helga. Det vert også buer i sentrum, som sel alt frå lakris til spekesild. Vi får hyggelege og trivelege handelsdagar, der ein kan møte kjente og ukjent frå heile Nordfjord og Søre Sunnmøre, fortel dei.
Stempeljakt
– Vi har også ei stempeljakt, og om du handlar på fire ulike butikkar så kan ein vinne. Då ber vi deg fylle ut kven av lag eller organisasjon du vil skal vinne 4.000 kroner. Og så kan du vinne 2.000 kroner til deg sjølv. Det er kjekke pengar for alle. I fjor var det eit lag i Oppstryn som vann, og det vert spennande å sjå kvar pengane går denne gongen, seier Gjerdevik.
Dei lovar gratis parkeringsplassar.
– Nordfjordeid sentrum er kjende for å ha mange nok parkeringsplassar til alle. Så må folk følgje med på sosiale media og programmet som står i avisa, fortel dei