Om lag 20 kilometer frå Nordfjordeid ligg den usjenerte og fredlege Hennebygda. Bygda har rundt 70 fastbuande og er ei bygd i vekst med lys i alle hus. Om sommaren doblar folketalet seg når utflytta hennjarar ferier i heimbygda.
Det er lite næringsliv i bygda bortsett frå litt jordbruk. Hennebygda har ei stolt historie som fruktbygd, men stordomstida på dette feltet tok slutt tidleg på 70-talet.
Vellukka marknad 2018
Leiar i marknadskomiteen, Gunn Henden, seier seg svært nøgd med 2018-marknaden. Vêret var svært lagleg, med god temperatur båe dagane. Ho trur at nettoinntektene vil bli som i fjor, rundt 60 000 kroner eller kanskje litt meir.
Laurdagskvelden møtte100 til quiz med spørsmål både om lokale forhold og tradisjonelle quizspørsmål . Det blei og servert grillmat, og Oddbjørn Melheim underheldt med gitarspel og song, og spela opp til dans på flaken utanfor samfunnshuset.
Søndag møtte godt over hundre på marknaden og barn og vaksne deltok med stor iver og engasjement i dei ulike aktivitetane. Det blei meldt om god stemning båe dagane med gode tilbakemeldingar til dugnadsgjengen.
Sosial møteplass
Samfunnshuset er plassen der folket i Hennebygda møtest for å ha det triveleg saman. På kulturfronten kan bygda skilte med spel- og dansarlag, revy, basarar og andre sosiale samkomer som skaper høg trivselsfaktor i bygda.
Mykje av dette skjer i samfunnshuset som bygdefolket legg ned stor dugnadsinnsats for å utvikle og vedlikehalde. Stadig fleire nyttar og dei funksjonelle lokala til bryllaup, konfirmasjonar og blåturar. Det seiest at ein fest i Hennjane er noko du hugsar ei stund.
Tidlegare fruktlager
Gunn Henden fortel at det var fruktlager i bygget fram til 1970-talet, og stor aktivitet med mottak, sortering og pakking av frukt. Det var tilsett eigen bestyrar som budde i leilegheit over fruktlageret.
Dei skifta glas og bordkledning på samfunnshuset i fjor, og det neste store prosjektet blir å skifte taket. Då kjem inntektene frå marknaden og andre samkomer vel med.
