Bjørlo Advokatfirma held til i Skreddarhuset i Øyane, der advokat Ann Mari Bjørlo opna dørene til eige kontor 1. mars.
– Nordfjordeid er den perfekte staden å starte opp med denne type konsulentbransje. Her når du enkelt både indre og ytre Nordfjord, Sunnmøre, Gloppen og Sunnfjord. Det tek litt tid å kome i gang, men så langt har responsen vore veldig god, seier Bjørlo, som per i dag er den einaste kvinnelege advokaten i Nordfjord.
Variert praksis
Ann Mari Bjørlo er oppvaksen på Bjørlo i Eid. Ho studerte juss seks år i Bergen og har offentlege innkjøp, EU/EØS-rett og konkurranserett som spesialfelt. Bjørlo har mellom anna vore eit halvt år i Brussel som praktikant i den norske EU-delegasjonen. Etter studiane jobba ho to år i KOFA (Klagenemnda for offentlege innkjøp). Så bar det heimover til jobb i Eid kommune som byggesaksbehandlar/juridisk rådgjevar i stab, før ho gjekk over til advokatbransjen med jobb hjå advokat Per Kjetil Stautland, først to år som advokatfullmektig og deretter to år som fast tilsett advokat.
Det siste året har Ann Mari Bjørlo vore juridisk rådgjevar/einingsleiar i Gloppen. Ho karakteriserer Gloppen kommune som ein veldig kjekk og inkluderande arbeidsplass. Der er det flat struktur og opne dører, og både innbyggjarar og tilsette kan stikke innom både rådmann og andre om ein har noko på hjartet.
Bjørlo har trivest godt med jobb på den andre sida av fjorden, men som ho seier sjølv:
– Eg er ein av dei som ikkje er skapt for pendling.
Med to gutar på 5 og 8 år er det praktisk å ha kontor i nærleiken, og med eigen praksis kan ho no i stor grad styre både arbeidstida si sjølv og kva saker ho vil jobbe med.
Fast eigedom
Dei ulike jobbane så langt har vore interessante, nyttige og lærerike på kvart sitt vis, og har gjeve henne ei god plattform når ho no satsar i eigen regi.
– Som advokat på landsbygda har du til ein viss grad det ein kan kalle ein «landhandlarpraksis», ein tek litt av kvart av saker, men også på landsbygda er det ein viss grad av spesialisering. Bjørlo tek sikte på at det er saker innan fast eigedom, medrekna plan- og bygningsrett og seksjonering, entrepriserett, tingsrett og avhending som vil utgjere hovuddelen i praksisen. Innanfor strafferetten har ho hatt ein del arbeid som bistandsadvokat.
Barn og familierett
– I tillegg jobbar eg ein del med barn og familie, mellom anna barnevernssaker og skiftesaker. – Eit fagområde som eg gjerne skulle sett meir fokus på, er barn sine rettar i høve opplæringslova og helse- og omsorgstenestelova; dette er ei svak gruppe som vi ofte ser ikkje får det dei har krav på med omsyn til oppfølging i barnehage og skule, og der det er mangel på kompetanse i den næraste kretsen.
