Ekspresidenten i Peru tok sitt eige liv då politiet kom for å arrestere han

Den korrupsjonsetterforska ekspresidenten i Peru, Alan Garcia, skaut seg i hovudet då politiet kom for å arrestere han. Kort tid etter døydde han på sjukehus.
utenriks

Påtalemakta hadde ferda ut arrestordre på den 69 år gamle ekspresidenten, som var under etterforsking for korrupsjon.

Hendinga fann stad i heimen til Garcia i hovudstaden Lima onsdag. Ekspresidenten vart umiddelbart frakta til sjukehus der han vart operert. Men ein talsmann for partiet hans, Apra, opplyser at Garcia døydde av skadane kort tid etterpå.

Garcia var ein av til saman tre tidlegare peruanske presidentar som blir etterforska for korrupsjon.

Ein domstol i Peru slo i november i fjor fast at Garcia ikkje fekk lov til å forlate landet på 18 månader medan styresmaktene etterforska skuldingane om korrupsjon i samband med skandalen rundt den brasilianske entreprenørgiganten Odebrecht.

Etter rettsavgjerda prøvde Garcia å søke politisk asyl i Uruguay.


Garcia var president i periodane 1985 til 1990 og frå 2006 til 2011.

(©NPK)