Oliver Solberg med sterk elitedebut i rally-VM

Oliver Solberg ligg på ein solid 8.-plass etter fartsprøvene på fredag i Arctic Rally Finland. For første gong køyrer ungguten i toppklassen i VM.
sport

Solberg vart høvesvis nummer ti og fire på dei to prøvene på fredag i Rovaniemi. 19-åringen starta VM-runden på morgonen med sjette raskaste tid i den såkalla «shake down»-løypa.

Totalt er han 45,9 sekund bak den leiande Estland-stjerna Ott Tänak i samandraget. Laurdag ventar seks nye fartsprøver, medan dei to siste prøvene til snørallyet blir køyrde søndag.

Solberg fekk ei trøblete opptakt til VM-debuten på WRC-nivå. Tidlegare i veka testa den faste kartlesaren hans Aaron Johnston positivt for korona. På kort varsel kom Sebastian Marshall inn som erstattar.

Føre sesongstarten fekk Solberg ein toårskontrakt med Hyundai-teamet. Fredag debuterte han i elite-VM fem år tidlegare enn det faren hans, Petter Solberg, gjorde i si tid. I 2003 vart faren verdsmeister.

Solberg junior har tidlegare køyrt i ein mindre klasse. Han køyrer elles på svensk lisens.

Løpet i Finland er andre VM-runden i sesongen av tolv.


(©NPK)