Dette er leiaren frå Fjordabladet fredag 15. august 2023:
Aldri før har det vore fleire grunnskuleelevar i Stad kommune. Når skulane startar måndag er det 1.197 elevar på barneskulane og ungdomsskulane rundt om i kommunen. Det er svært gledeleg at elevtalet går opp.
Ved Hjelle skule opplever dei ei god utvikling. Heile 16 førsteklassingar startar ved skulen no i haust, og mykje tyder på vekst også i åra framover.
Det kan tyde på at tilgang på bustadar og tomter er viktig for å få ei slik utvikling i elevtalet.
Også i ytre del av kommunen er det ein liten auke i elevtalet. På Stadlandet har det siste åra også vore ein fin vekst og skuldast tilflytting over fleire år. Ser ein på tala for alle skulane har dei fleste hatt ein liten vekst siste åra.
Fleire av skulane har plass til endå fleire elevar, medan andre er «trangbodde». Slik som sentrumsskulen på Nordfjordeid. Det er mange elevar i kvar klasse, utan at klasseromma har vorte noko større. På sommaren skjer det noko med flyttestraumen. Nokon flyttar ut av Stad, andre kjem flyttande hit. At det skjer på sommaren er naturleg då elevane kan begynne nytt skuleår i ny klasse på ny stad. Det er mange spente elevar som no er klare for skulestart – enten ein er ein av dei 110 heilt ferske førsteklassingane eller ein berre rykkjer opp eit årstrinn. Det er mykje nytt for alle. Kanskje har ein også fått ny lærar eller ein ny elev i klassa.
Når barna no begynner på skulen igjen har vi foreldre også ei viktig rolle.
Alle må vere flinke til å framsnakke skulen. Vi må også legge forholda til rette for at elevane kan besøke kvarandre og bli kjent med nye vennar. Og vi må gjerne gi dei i oppgåve å seie «hei» og ta kontakt om ein ser ein medelev står åleine eller vert halden utanfor i leiken.
God skulestart til alle!