Dette er leiaren i Fjordabladet frå fredag 15. september 2023:

Valdagen måndag vart ikkje den viktige høgtidsdagen for alle. Ikkje alle som ville stemme, fekk stemme.

For på Nordfjordeid gav folk opp å stå i lang, lang kø i regnvêret utomhus. Det er ikkje for alle å orke å stå ein time eller 1 1/2 time i kø i regn – utan å kunne sette seg ned. Mange snudde og reiste heim- utan å stemme. Fjordabladet har fått haugevis av meldingar og telefonar over fortvila og sinte folk.

Det er respektlaus at veljarane vert møtt på den måten dei vart. På tettstaden Nordfjordeid hadde veljarane berre tre avlukke dei kunne velje partilistene og gjere endringane dei ville.

Til samanlikning var det tre også på Stadlandet, med langt mindre innbyggjartal. I Stryn hadde dei kosta støvet av åtte avlukke, og i Ørsta hadde dei ti. Vi stussar også på sjølve stemmelokale – i gangen i idrettshuset, medan kyrkjevalet var lagt til den store hallen.

At folk på Nordfjordeid gir opp å stemme er eit demokratisk problem.

Så var det berre 64,4 prosent som avgav stemme i Stad, ein langt lågare frammøteprosent enn det vanlegvis er i eit kommuneval. For oss er det tydeleg kvifor det var slik.

Vi høyrer unnskyldninga om at folk brukte så lang tid i stemmebåsane. Det er eit argument som ikkje held.

Veljarane må få bruke så langt tid dei treng. Om ein ikkje var så fornøgd med listene i år, så var det kanskje større behov for å lage sine eigne lister – sette ekstra kryss og trekke inn namn frå andre. Vallova gir oss lov til det.

Eit kommuneval er også eit meir personval, og då brukar vi meir tid på å stemme, enn ved eit stortingsval der du berre skal velje deg ei liste du ikkje kan gjere endringar på.

Det vert argumentert med at folk kunne ha førehandsrøysta. Men nokre veljarar bestemte seg ikkje før på sjølve valdagen, og dermed er førehandsrøysting uaktuelt. Så er det ein gong slik at det er valdagen du er invitert til å stemme. For mange er det ein høgtidsdag.

Sjølve resultatet frå valet kan ha fått eit anna utfall om alle som ville stemme, fekk stemme.

Fleire frå ytre del av kommunen enn indre har kome inn i det nye kommunestyret. Kanskje hadde fleire personstemmer frå eidarane endra dette.