Ei hektisk førjulstid er unnagjort, med flust av julekonsertar og julebord som har sett oss i adventsstemning, eller skuleavslutningar der elevar stolte kan vise fram kva dei har øvd på i lang tid til foreldre og besteforeldre.
Gjennom årets adventstid har vi fått vore saman – i motsetning til i fjor då koronapandemien sette ein brå slutt på det meste – og gav oss innskjerpa reglar for korleis vi kunne leve livet vårt.
Det er likevel eit alvorleg bakteppe til denne jula. Det er framleis krig i Ukraina, og Putin ser ikkje ut til å gi seg med det første.
Dyrare straum, og høgare rente, drivstoffprisar og matvarer gjer at fleire slit økonomisk. «Alt» er blitt dyrare.
Men jula er ikkje avlyst. Vi kan vere saman med dei nære, senke skuldrene og nyte fine juledagar. Opp i vår overflod av mykje julegåver og mat er det eit tankekors at fleire slit også i vår eiga heimkommune.
Eid og Selje Røde Kors, Frivilligsentralane, handelsstand og ulike etatar i Stad kommune gått saman for å gjere det litt lettare for dei som treng noko ekstra no i desse tider. Aldri før er det så mange som har bedt om hjelp med ei matkasse til jul. Det er ikkje akkurat ein rekord vi skal vere stolte av at det er over 100 i vår eigen kommune som slit og som må be om hjelp.
Men både næringsliv og vi som privatpersonar har bidratt med hjelp – enten med pengegåver, julegåver eller vi har putta matvarer opp i handlevognene som har stått rundt om i alle daglegvarebutikkane i kommunen. Behovet er absolutt til stades.
Vi vil oppmode om å tenkje litt ekstra på dei som sit åleine, dei som har mista nokon nære, eller som slit på ein eller annan måte. For opp i all vår overflod og juleglede er det dei som av ulike grunnar gruar seg til denne tida.
Vi i Fjordabladet vil ønskje deg og dine, abonnentar og annonsørar ei riktig god jul!