Av Alfred Bjørlo, listekandidat for Venstre og tidlegare ordførar i Eid/Stad:
Ingen bør ta for gitt at den sterke utviklinga og «hamskiftet» vi har sett på Nordfjordeid og i Eid dei 12 siste åra, tatt vidare i Stad kommune, vil halde fram. «Nye Eid» er resultat av ein politikk som heiar på næringsutvikling, utdanning, sentrumsutvikling og å samarbeide meir i Nordfjord enn før – og eit nært og tillitsfullt samarbeid mellom gode krefter i lokalsamfunnet.
Det rykande ferske Kommunebarometeret frå Kommunal Rapport, den beste oversikten over tilstanden i kommune-Noreg, rangerer no Stad som den 25. beste av alle 359 kommuner i Noreg. Det er eit oppsiktsvekkande godt resultat for ein mellomstor kommune i distrikts-Noreg – og er resultatet av årevis med hardt og systematisk arbeid frå svært mange – der ein konsekvent har sett framover og våga å endre det som må endrast i ei ny tid.
Eg er overtydd om at eit sterkt Stad Venstre i kommunestyret, med listetopp Jon Frogner som ny ordførar og forstandige folk frå ytst til inst i kommunen elles på lista, er den beste garantien for at utviklinga dei siste 12 åra vil halde fram. Vi kan og må ikkje tilbake til «den gamle normalen» i Eid frå åra før 2011. Det var ei tid der folketal, handel og næringsetableringar stagnerte, ingen viktige byggeprosjekt som nytt omsorgssenter eller ny fleirbrukshall i sentrum vart realisert, sjukehuset vårt vart bygd ned av Ap/Sp-regjeringa som då sat med makta - og samarbeidet i Nordfjord gjekk på sparebluss. Å røyste Venstre, er den beste garantien for at dei tidene ikkje kjem tilbake.
Uansett: Godt val – og hugs at du også må putte den blå røystesetelen til Fylkestingsvalet i urna! Venstre har ein nordfjording på topp der også: Åsta Årøen frå Blakset i Stryn.