Skrive av Astrid Henden

Eg sit her i Bruhola og følgjer med i valet, så godt det let seg gjere. Og det er ikkje så vanskeleg. Men at dette faktisk har vore eit kommuneval, ser ut til å ha gått media forbi. “Her skal du få alt frå valget fra hele landet,” var den glade meldinga måndag kveld. Eg var vel ikkje den einaste som benka meg framfor fjernsynet. Den siste tida har det berre vore rikspolitikk å få høyre og sjå. No skulle endeleg vi i dei mange kommunane verte tekne på alvor.

Men kva var dette? Var det berre “dei store byane” som var viktige? Og kvifor skulle det heile tida lagast prognosar som om dette var eit stortingsval? Kvifor måtte regjeringa heile tida dragast fram som syndebukkar?

Noko klårare bevis på at vi på landsbygda vert oversett, er det ikkje råd å få.

Det kan også vere eit tydeleg teikn på at kommunane ikkje er så sjølvstendige lenger. Faktisk har eit kommunestyre små rom for styring. Alle kommunane er avhengige av det vi “får” frå staten, styrt frå Oslo.

Eitt er sikkert. Det nye kommunestyret i Stad får mykje å ta fatt på. Eldreomsorga får alltid fokus i valtider. Men kva er eldreomsorg? Den offentlege eldreomsorga er sjukeheimsplassar og hjelp til dei som ikkje lenger kan greie seg sjølve, og takk og pris for at den er god i vår kommune.

Den eldreomsorga som vert gjeve av eldre i heimane vert det  mindre snakk om. Eg vart sjokkert då eg las at det berre er 14 i vår kommune som får omsorgsløn, og at denne framleis vert innkorta, truleg ei følgje av innstramminga som vart gjort av førre regjering.

Eg  har levd lenge som pensjonist. Eg har sett at mange av mine vener og kjende har slite seg ut på å hjelpe ein ektefelle som ikkje lenger  greier seg sjølv. Ein ektefelle som helst skulle ha fått hjelp av det offentlege, men som ikkje vil på sjukeheim. Der hamnar derimot den attlevande, utsliten. Eg var sikker på at desse i alle fall fekk løn for arbeidet sitt. Dei har spart, og sparer, kommunen for mykje pengar, og er heilt uunnverlege.

Derimot vert alle vi pensjonistar sett på som tyngjande for landet sin økonomi. Vi er for mange! Den komande eldrebølgja har lenge vore brukt som ei unnskyldning for å redusere veksten i alderspensjonen.

At eldre faktisk er ein stor ressurs, er til og med no sløyfa i festtalar.