Av Siv Emdal, 2. kandidat kommunevallista Stad SV:

Mykje av  køyringa med privatbil er korte turer på under 5 km t.d.  til jobb, for å handle mat eller for å få ungane på ulike fritidsaktivitetar. I store deler av kommunen er avstandane sjølvsagt vesentleg  lenger enn det.

Kva skal til for at folk i større grad vil nytte kollektivtransport, gå eller sykle i staden for å bruke bil. Det viktigaste er at det let seg gjennomføre i praksis utan urimeleg lang venting og at det er trygt å ta seg fram på andre måtar. Dersom fleire skal bruke kollektiv transport må det fungere i kvardagen. Folk må vere sikre på at dei kjem seg både fram og tilbake dit dei skal, innan rimeleg tid. Slik er det ikkje i dag. I dei mest avsides liggande  bygdene er skuleruta den einaste ruta dei har og den er innstilt heile sommaren. Då er det rett og slett  ikkje mogeleg å klare seg utan bil.

For eldre og andre med helseutfordringar  kan også vegen fram til næraste busstopp vere det som hindrar ein i å nytte offentleg transport. Det vert rett og slett for langt og krevande å ta seg fram til busstoppet.

Gjennom dei siste 40 åra har lokalbusstilbodet blitt stadig dårlegare og færre brukar det. Dette er ein ond sirkel som er vanskeleg å snu, men ikkje umogleg. Vi må endre tankegangen frå at det ikkje er lønsamt å bygge ut kollektivtrafikk i distrikta, til at alle i heile landet skal ha eit  godt kollektivtilbod.

For å få det til, må rammeoverføringane frå staten til fylkeskommunen til drift av kollektivtrafikk aukast svært mykje. Staten bidreg i dag  med økonomisk  støtte til dei største byane  gjennom byvekstavtalen. Det vert og gjeve tilskot til nokre mindre byområder. Staten bør innføre ei tilpassa tilskotsordning for mindre kommuner som ynskjer å gjere tiltak for å få fleire til å nytte kollektivtransport, gå eller sykle i staden for å bruke bil.

Korleis kan vi gjere det lokalt? Fleire bussruter i bygdene og byggefelta våre som går ofte, ikkje minst på ettermiddag og kveldstid når fritidsaktivitetane foregår. Det bør også lagast ei bestillingsordning slik at dei som har behov for det, kan bli henta der dei bur. Ei slik ordning vil gjere det lettare for eldre å bli buande i heimen. Vi har riktig nok ei ordning med service skyss frå bygdene i tidlegare Eid kommune og til sentrum. Men rutene  går berre tysdag annan kvar veke og dei færraset er hjelpte med ei rute som går 2 gongar i månaden. I ytre har dei ikkje eingong det tilbodet.

 Det må og  settast opp vesentleg fleire gjennomgåande ruter slik at folk kan reise mellom bygdene og tettstadane våre og rutene må korspondere med kvarandre. Dersom folk ser at det er eit tilbod som fungerer for dei, vil dei  bruke det.

Dersom fleire kan klare seg utan bil til daglege gjeremål vil det også bli meir aktuelt å vere medlem i ein bildelering i staden for å eige sin eigen bil. Slik det er no vert gjennomsnittsbilen brukt 3.2% av tida. Det skulle tilseie at vi kan klare oss med færre bilar og heller låne ein bil frå ein bildelering når vi treng det.

Dersom vi skal få ned utsleppa og energibruken til transport må vi over på meir kollektive løysingar. Det krev ein politikk der ein ikkje berre legg vekt på økonomi og lønsemd men i mykje større grad vektlegg miljø og samfunnsomsyn. Dette er ein politikk vi i SV står for. SV vil jobbe inn mot politikarene sentralt og på fylkesnivå for å få meir midlar til kollektivtrafikk, sykkel og gangvegar.

Tilbake til spørsmålet, kan eg leve eit aktivt liv i Stad kommune utan bil? Slik kollektivtilbodet er no, trur eg det vil bli svært krevande. Med eit vesentleg betre kollektivtilbod og medlemsskap i ein lokal bildelering trur eg det kunne gått heilt fint.