Vi som bur langs med FV 5746, Torheimsvegen, på sørsida av Eidsfjorden, er ikkje bortskjemde med glimrande vegstandard. Faktisk er vegstandarden så pass «rystande» at når vi kjem til Nordfjordeid sentrum og møter skilta som varslar fartsdumpar så veit vi at dette likevel er betydeleg jamnare vegbane enn det vi er vande med på «vår» veg!
Likevel finst det lyspunkt! Denne sommaren har dei som er ansvarlege for vedlikehald av vegen tilgodesett oss med heile 100 m nytt asfaltdekke på eit av dei verste partia på Taklo! Ein augneblink eller to kunne vi faktisk drøyme at vi køyrde på veg med høgare standard!
Men kor lenge var han Adam i Paradiset? Berre nokre få dagar etter at dette nye asfaltdekket var lagt kom dei jammen att og grov eit hol i det nylagde dekket! Slik har det no stått i fleire veker utan at det tilsynelatande er gjordt freistnad på å fylle ny asfalt i det nemnde holet. Rett nok har dei sett opp eit refleksmerke som varslar holet – men med ei vegbreidde som knapt utgjer ei køyrebane er det få moglegheiter til å svinge unna!
Uansett kva som var årsak til at den nylagde asfalten vart graven opp ville det for oss som dagleg ferdast på vegen, og truleg også for dei fleste andre, vore naturleg å utføre dette arbeidet FØR ein la nytt asfaltdekke!
Dei som har ansvar for planlegginga, eller mangel på planlegging, av dette bør i det minste no planlegge å fylle att den oppgravne vegbana før vinteren kjem!
Gjennom mine vel 25 år som offiser i Forsvaret/Heimevernet lærde vi at soldatane av og til kunne omtale befalet slik: «dei som Gud ikkje gav hjerne – dei gav han vinklar og stjerne». Eg skal ikkje ta stilling til sanninga i denne beskrivinga – men i fall det skulle stemme vil eg likevel påstå at jammen hadde han nokre vinklar og stjerner att til dei som driv vegvedlikehald også!