Av Karianne Torvanger, leiar i hovudutval for opplæring og kompetanse :

No er sommaren på hell, og det nærmar seg både kvardag og skulestart igjen. Det er nok mange som kjenner på ein klump i magen og som gru-gleder seg til den nye kvardagen som ventar, anten ein skal begynne på vidaregåande for første gong, eller om ein skal vidare på eit påbegynt opplæringsløp. Nokre har gjerne flytta til ein heilt ny plass og kjenner ikkje så mange, andre igjen gleder seg til å sjå igjen venene dei ikkje har sett heile sommaren.

I Vestland har vi eit mangfald av elevar og lærlingar med stort spenn i føresetnadar, behov, interesser og mål for utdanning og yrke. Vårt mål er at elevar og læringar i Vestland har det beste opplæringstilbodet med stor merksemd på trivsel, motivasjon, læring og meistring i eit inkluderande miljø.

Eit inkluderande miljø er når alle har respekt for kvarandre. Det må vere rom for alle og akseptert å være annleis. Om det er nokon som ikkje har det så greitt på skulane våre, er det viktig å seie frå så tidleg som mogleg, både for elever og føresette.

I Vestland har vi to elev- og lærlingombod som er tilgjengelege, og som kan både støtte, rettleie og gje råd i ulike situasjonar. Dei jobbar for at du som er elev, lærling eller lærekandidat skal få oppfylt rettane dine, og dei har også teieplikt. Vi har også miljøkoordinatorar på alle skulane våre som skal bidra til auka trivsel og eit godt skulemiljø. Og som kan hjelpe dykk som elevar til å finne dykk til rette på skulen.

Det å skape ein god skule og ein god skulekvardag for alle, krev ein innsats av oss alle. Også deg som er elev!

Eg vil oppfordre alle til å ta eit ekstra ansvar og bidra slik at alle får ein god skulekvardag. Eit smil eller eit hei kostar ikkje mykje, og det kan bryte barrierar. Ver ein som bryr seg!

Mange av lærarane våre starta dette skuleåret med å delta på eit seminar om kunstig intelligens og ChatGPT. Det er eit felt som både er spennande, men som også er utfordrande for oss. Korleis vi skal implementere desse verktøya i skulen i Vestland på ein god måte, er noko vi må arbeide med framover. Dette er eit arbeid eg håpar du som elev også vil bidra i.

I år er det også valår. Det er lokal- og fylkestingsval, og det blir gjennomført skuledebattar og skuleval på alle dei vidaregåande skulane våre. Føremålet med dette er å lære dykk meir om demokratiet, og korleis samfunnet vårt fungerer. Ta vel imot ungdomspolitikarane våre og nytt høvet til å lære meir om dei ulike partia.

Velkommen til nytt eit nytt og innhaldsrikt skuleår i Vestland!