Av Marie Kristine Kroken, Stad MDG:

Her kan du lese om kva vi i MDG tenkjer om bru mellom Lote og Anda og kvifor den ikkje bør byggjast.

I Dagsavisen sin leiar 29.08.2023[1] kan ein lese at både Transportarbeiderforeninga og Lastebileierforbundet ynskjer at midlar vert brukt på å oppgradere og trygge eksisterande vegar framfor råflotte veiprosjekt.

Det er vi i MDG einige i. Særleg på Vestlandet har vi i dag vegar som er så farlege og usikre at yrkessjåførar er redd for å køyre på dei. Sommarens nedbørrekord synte for dei fleste at vi har mykje å ta tak i på det vegnettet som allereie er, framfor å bygge bruer vi ikkje absolutt treng.

Det vert nemnt av fleire som eit argument for bru at det gjer vondt å sløse pengar. Vi er eining i at det kan vere vondt å sløse pengar, men det er ikkje eit godt argument for å bruke endå meir pengar på noko som ikkje vert eller bør bli realisert. Då er beste innsparinga å stoppe pengane til prosjektet no.

Ifølge tal frå kommuna har Stad kommune gitt Nordfjordbrua AS eit fast årleg driftstilskot på 150.000. I tillegg har kommuna betalt inn utvida aksjekapital på 0,6 million i 2020 og 1,0 million i 2022. I tillegg kjem utgifter frå tidlegare år under Eid kommune. Dette er pengar ein har brukt på eit prosjekt som staten aldri har gått inn for, som ikkje er tatt med i Nasjonal Transportplan og som Statens vegvesen meinar ikkje er trafikalt grunnlag for å byggje. Vegvesenet valde difor ein annan trase for ferjefri E39. Pengebruken er vedtatt av kommunestyret. Vi meinar det ikkje er rett pengebruk. Desse pengane må heller brukast til naudsyn drift av kommuna og til betring av infrastrukturen som allereie eksistera i dag.

Lovnadane om at brua skal gi vekst i heile regionen vert etter vår meining berre konstatert utan nyansar. Brua skal gi vekst og aktivitet for heile regionen lovast det. Vi meiner konsekvensane av ei bru kjem til å vere meir variable enn det som vert lova. I Gloppen er det til dømes fleire som fryktar handelslekkasje, ei bekymring vi delar. Eid som eit større sentrum trur vi vil trekkje ressursar frå Sandane. Vi synes ikkje ein skal gå inn for eit prosjekt som vil gi oss vekst på kostnad av naboane våre. Ei slik kommune ynskjer ikkje vi at Stad skal vere.

Vidare meiner vi lovnadane om vekst er ein gamaldags og utdatert måte å tenke vekst på. Veksten skal jo kome av at vi skal reise meir, handle meir, bevege oss meir. Dette er ei utvikling i feil retning. Vi må få ned forbruket, ikkje auke det.

Dei som ofte treng å krysse fjorden veit når ferja går. Vi har to elektriske ferjer med rikeleg plass som går tre gongar i timen. Vert det dårleg vær og ferja må stå, vil ein også gjerne måtte stenge ei bru.

Naturinngrepa ved ei bru er heller ikkje kommentert av nokon som framsnakkar prosjektet. Men dei foreløpige planane som føreligge vil gi ekstreme fotavtrykk både med tanke på økologiske inngrep og klimagassutslepp. Det vil føre til store inngrep i naturen å byggje ei bru, og særleg Lotshavet er sårbart for påverknad. Det vil også lede til auka trafikk og større utslepp, noko som er å gå i feil retning. Vi må få ned utsleppa ikkje auke dei.

I tillegg er Nordfjorden heilt unik utan bruene. Besøkande kjem ikkje for å sjå kva vi byggjer, dei vil sjå der det ikkje er bygd noko, det urørte og utemma.

Som det er nemnt av fleire som er for bru, folk skal over den fjorden uansett. Det har vi ein lang historie på at det har folk klart heilt fint med ferja.