Av Jon Frogner, ordførarkandidat for Stad Venstre:

I valkampen har eg fanga opp fleire interessante tilbakemeldingar frå veljarar. Mange opplev at dei fleste partia snakkar om omlag det same. Korleis skal ein då vite kven som leverer, og kva ein skal røyste?

Stad kommune har gått med overskot i alle år, med Venstre i førarsete. Samstundes har vi betent lånegjelda vår. Det har vore brei politisk semje om nye låneopptak til naudsynte tiltak innan skule og oppvekst, helse og eldreomsorg.

I denne fyrste kommunestyreperioden i Stad frå 2019-23 har lånegjelda auka med ca 190 mill NOK (pr 30.04.23, tal frå Stad kommune). Disposisjonsfondet, det vil seie kontantane til kommunen, har i same periode auka med over 130 mill NOK.

Stad kommune gjer det godt

Ifylgje Kommunebarometeret 2023 («Kommune-NM») er Stad kommune svært godt dreve, med høg kvalitet på tenestene. Det holdt til ein 25. plass av 356 kommuner, opp fra 123. plass året før. Tilsette, kommuneadministrasjon og politikarane i Stad har grunn til å vere stolte av dette resultatet.

Dei aller fleste eg møtar trivest godt i kommunen vår. Dei set pris på utviklinga Venstre har vore pådrivar for, og lykkast med i lag med veldig mange gode kreftar i lokalsamfunnet. Slik har det ikkje alltid vore.

Stad kommune er den største arbeidsgjevaren i kommunen. Dei fleste tilsette jobbar i helse og omsorg, og i grunnskule og barnehage. Med nylege kutt i dei kommunale tenestene kjenner mange på eit auka press i arbeidskvardagen. Det er behov for meir ressursar innan barnehage, skule, helse og eldreomsorg, teknisk, ja, det meste.

Bakgrunnen for det økonomiske presset er mellom anna auka kostnader og høge renter. Framover vil det vere eit aukande behov for kommunale tenester, som treng meir finansiering. Det er framleis mykje å ta tak i.

Balansen mellom offentleg, næringsliv og frivillige

I ein situasjon med press på økonomien vert det viktigare enn nokon gong å hugse på at dei som driv bedrifter og skapar arbeidsplassar i næringslivet, er under det same økonomiske presset.

Like viktig som å sikre nok ressursar til kommunale tenester, er vi nøydde til å sikre investeringsvilje og attraktive rammevilkår for industrien og servicenæringane. Vi må klare å halde på og skape nye arbeidsplassar. Vi må halde fram med å få til gode samarbeid, som gjer det attraktivt å bu, jobbe, investere og utvikle seg i Stad kommune. Vi må halde fram med å styrke kommunesenteret vårt, Nordfjordeid, som ein vekstmotor for heile kommunen og regionen. Det må bli skapt større verdiar til fordeling.

Fellesnemnaren er behov for fleire folk, meir kompetanse, nyskaping og aktivitet. Det krev ein politisk leing som er frampå, som maktar å engasjere heile lokalsamfunnet. Venstre er ein slik kraft, og har ført ein politikk som har slått tidlegare utviklingsprognosar for gamle Selje og Eid ned i støvlane. Stad kommune skal ikkje berre drive tenester, han må også legge til rette for framtida.

Meir enn kommunale investeringar og tenester

Årsaka til at eit blomstrande næringsliv og vekst i folketal er so viktige saker for Venstre, er at dei er føresetnader for gode kommunale tenester. Og gode kommunale tenester er like mykje ein føresetnad for at næringslivet skal få dekt sine behov. Det heng ihop. Dette er ein fin balanse, og ein samanheng som alle bør vere merksame på. All den frivillige innsatsen som blir lagt ned i kommunen er også heilt avgjerande for dei verdiane som blir skapt og den utviklinga vi ynskjer.

Eit sterkt Venstre i Stad kommunestyre vil bidra til å oppretthalde denne fine balansen, slik at det offentlege, dei private og dei frivillige kan samarbeide best mogleg i lag. Vi meiner løysinga på dei økonomiske utfordringane er vidare vekst i folketal, handel, næringsliv, innan naturen sine tolegrensar.

Om ikkje berekraft lå til grunn for politikken vår, kunne eg ikkje vore med i Venstre. Berekraft inneber løysingar som er sosialt, økonomisk og miljømessig levedyktige over tid. Meir om dette i valprogrammet vårt, som eg oppmodar til å lese.

Eg stiller som ordførarkandidat for Stad Venstre fordi eg dei siste 13 åra har hjelpt verksemder over heile landet med vekst, utvikling og omstilling. No håpar eg mi erfaring og kompetanse kan bidra til ytterlegare skritt framover for Stad kommune.