– Ikkje dei og oss
− Kva meiner du Eid kan bidra med til Stad kommune?
− I Eid har vi blitt veldig flinke til å løfte i flokk, så vi får til det utrulege berre vi vil!
− Kva må til for at Stad kommune skal bli ein suksess?
− Eit godt tenestetilbod, som legg til rette for ei positiv utvikling i heile den nye kommunen, skape ein felles identitet, vere attraktiv for tilflytting, eit drivande næringsliv og få vekst i folketalet.
− Kva forandringar ville du gjere i Eid dersom du var «allmektig»?
− Vi må gje rom til dei som har kritiske synspunkt og, ei sak har som regel to sider.
− Politisk førebilete?
− Det må bli Obama. Ei utruleg politisk kraft som gav titals millionar amerikanarar rett til grunnleggjande helsetenester.
− Kva er det kjekkaste du har vore med på som lokalpolitikar?
− Opninga av gang- og sykkelvegen på Haugen var ei utruleg flott oppleving. Det same var gjennomslaget Eid Senterparti fekk for å byggje stor Eidahall ved Nordfjordeid Skule.
− Det verste?
− Tøffe nedskjeringar i fleire rundar opp gjennom åra. Det er alltid vanskeleg. Det aller verste var i 2007 då eg føreslo å sløkkje alle gatelysa i kommunen for å spare pengar. Det vart vedteke og det vart eit enormt engasjement mot dette for å seie det forsiktig. Det heile enda med at vi måtte skrue på lyset att etter ein månad.
− Kva burde kommunen bruke meir pengar på?
− Vi burde prioritert ressursar til dei eldre og elevar i grunnskulen.
− Og mindre?
− Vi må bruke mindre på mykje som ikkje vedkjem tenesteproduksjonen.
− Det beste som har skjedd i Eid kommune dei siste åra?
− Det beste er at vi fekk samlokalisert Eid vidaregåande skule og bygd Operahuset Nordfjord. Det har gjeve grobotn og vekstkraft til det meste vi er stolte av i dag, som Malakoff, Opera Nordfjord, og den positive utviklinga i kommunen generelt.
− Det verste?
− At kommunestyret vedtok nedlegging av Kjølsdalen Skule.
− Kor aktiv er du på sosiale medium?
− Er aktiv på Facebook. Prioriterer ikkje andre kanalar.
− Kva meiner du om eigedomsskatten?
− Eg er ikkje tilhengar av eigedomsskatt, men på grunn av den stramme økonomien til Eid, så må vi vidareføre den som no.
− Er det nokon «kvardagshelt» du vil gje blomster til?
− Foreldra mine. Dei er smurningen som får kvardagen til å gli lettare.
− Kva har opptatt deg i det siste?
− Bryllaupsførebuingar i kombinasjon med pappapermisjon. Eg og Jagoda gifte oss 1. desember og dottera vår, Silje, kom til verda 17. januar. 2017, eit fantastisk år, best ever!
− Kva er det beste med å bu i Eid?
− Kort veg til det meste og godt samhald!
− Kva er det verste du veit?
− Festtalar mot betre vitande.
− Kvifor har du valt Senterpartiet som ditt parti?
− Fordi vi vil byggje samfunnet nedanifrå. Vi trur på folkestyre, ikkje elitestyre.