Ifølge Pål Nyttingnes er det viktig å følge med i tida, og følge utviklinga innan landbruket. I staden for å drive mjølkeproduksjon åleine vel han no å bli del av eit større felleskap.
– Landbruket er i endring, det går mot større einingar. Det er i den retninga det går anten vi vil eller ikkje. Å gå med i samdrift gir meg høve til å vere del av eit større fellesskap, og mulegheita til vidareutvikling av gardsdrifta. Det er også veldig greitt å samarbeide og dele på arbeidet, seier Pål.
Ikkje berre er han gardbrukar, men har også ein fulltidsjobb som assistent i skulen. Om sommaren driv han gartneri, og innimellom arbeider han med alternativ behandling. I tillegg er han ein ivrig laksefiskar.
– Eg har nok å gjere, kan du seie, seier Pål og ler.
Håpar på grei overgang for dyra
I fjøset har Pål 22 storfe som skal flyttast inn i fjøset på Åshamaren. Det er både kyr, kviger og kalvar.
– Det tek litt tid før dei finn sin plass i flokken, vi får berre sjå og håpe på at det går bra. Det er heldigvis mange dyr som flyttast samtidig, så eg trur ikkje det blir dei store utfordringane, meiner han.
Frå før er kyrne vande med bås, mens no får dei gå fritt saman med dei andre i lausdriftsfjøsen. Det blir også andre rutinar med mjølking som kyrne må venne seg til.
– Kyrne er vande til å gå på fjellbeite om sommaren, så eg trur ikkje det blir noko problem. Vi kjem også til å nytte fjellbeite framover, slik at utmarka kjem til å bli nytta som før, legg han til.
Beheld sauedrifta
Nyttingnes har ikkje berre storfe på garden på Roti, men også 40 vinterfôra sau. Dei vil han framleis ha på garden, slik at ikkje all drift forsvinn.
– Eg ønsker framleis å ha dyr på beita rundt garden og i utmarka. I første omgang kjem eg til å flytte sauene ned i kufjøset, men på sikt ser eg føre meg andre føremål med bygningane, utan å røpe for mykje.
Vil vidareutvikle
Både Kjell Magne og Nikolai er glade for det nye tilskotet i samdrifta og håpar på godt samarbeid dei kommande åra. Fordelinga mellom dei blir ni månader på Kjell Magne, to månader på Pål og ein månad til avløysar.
– Vi kjem til å ha jamne planleggingsmøte for å halde kvarandre oppdaterte. Det viktigaste i ei samdrift er kommunikasjon, og at ein veit at ein har med menneske å gjere. Så må vi justere oss etter kvarandre undervegs, seier Kjell Magne Åshamar. Også Nikolai ser føre seg ei framtid med større fjøs, og mjølkerobot.
– Eg legg ikkje skjul på at eg ser føre meg mjølkerobot om nokre år. Vi kjem i allefall til å søke på tilskot kvart år til vi får det, seier Nikolai.
