Ei pressemelding frå Kunnskapsdepartementet peikar på at mange lærar i grunnskulen i Sogn og Fjordane manglar nok studiepoeng til å vere kvalifisert for undervisning frå 1. august 2025.
Men ser ein på grunnskulelærarar i Eid kommune, ligg dei godt an i høve til resten av landet når det gjeld kompetanseheving etter Kunnskapsdepartementet sine retningslinjer, og vedtak i Stortinget.
Etter 2025 blir det krav om at alle norsklærarar på barneskulen må ha minst 30 studiepoeng, og 60 studiepoeng på ungdomsskulen, for å undervise i faget. Det same gjeld for matematikk og engelsk.
Det er særleg i faget norsk at lærarane i Eid kommune ligg føre i løypa i høve til kompetanseheving. Berre ni prosent av dei som underviser i faget norsk i Eid manglar 30 studiepoeng, eller 60 studiepoeng på ungdomsskulen.
På landsbasis er det heile 26,5 prosent av norsklærarane som ikkje har 30 studiepoeng i faget.
Manglar meir i Selje
I Selje kommune er det heile 36 prosent av engelsklærarane som ikkje fyller kompetansekrava 2025. Dette er 14,2 prosent meir enn gjennomsnittet i Nordfjord. Selje har også mange matematikklærarar som treng kompetansepåfyll (29%), medan nitten prosent av norsklærarane ikkje fyller krava i Selje.
Bra i Nordfjord
Samla sett kjem Nordfjord best ut i fylket. Innan både norsk, matematikk og engelsk er det fleire lærarar med nok studiepoeng i høve til både Sogn og Sunnfjord.
Det er også i Sogn og Sunnfjord ein finn «verstingane» innan mangel på nok kompetanse.
Til dømes er det i Årdal heile 72 prosent av engelsklærarane som ikkje fyller kompetansekrava, og 69 prosent av matematikklærarane er i same situasjon.
Lærdal peikar seg også ut med få lærar som fyller kompetansekrava.
Engelsk, engelsklærarar som manglar 30 studiepoeng, eller 60 poeng på ungdomsskulen.
1. Selje 36%
2. Gloppen 32%
3. Bremanger 29%
4. Eid 25%
5. Stryn 18%
6. Vågsøy 13%
7. Hornindal 0%
Nordfjord 21,8%
Sogn og Fjordane 35%
Heile landet 37,5%
Norsk, norsklærarar som manglar 30 studiepoeng, eller 60 poeng på ungdomsskulen.
1. Gloppen 24%
2. Stryn 20%
3. Selje 19%
4. Bremanger 11%
5. Eid 9%
6. Vågsøy 5%
7. Hornindal 0%
Nordfjord 13%
Sogn og Fjordane 18%
Heile landet 26,5%
Matematikk, matematikklærar som manglar 30 studiepoeng, eller 60 poeng på ungdomsskulen.
1. Gloppen 32%
2. Selje 29%
3. Stryn 29%
4. Eid 23%
5. Vågsøy 20%
6. Bremanger 15%
7. Hornindal 0%
Nordfjord 21,4%
Sogn og Fjordane 29%
Heile landet 32,5%