– Vi gler oss til å gje store og små gode opplevingar i lag med hestane på Norsk Fjordhestsenter. Det er først og fremst dette julemarknaden vår handlar om, opplevingar og den unike stemninga det blir med kombinasjonen jul og dyr, seier Siri Endal, som er lærar på hestelinja ved Fjordane Folkehøgskule.
Overskot til forsking
Ho understrekar at skulen ikkje arrangerer Jul i Stallen for å tene pengar.
– Dette er ikkje ein marknad som folkehøgskulen tenar pengar på. Halvparten av overskotet går kvart år til ein organisasjon som elevane har valt ut. I år er det forsking på ALS som mottek støtte frå oss. Resten av overskotet går tilbake til elevane, der dei er med på å bestemme kva dei skal få bruke pengane på. Ein takk for hjelpa til dei, sidan dei er dei viktigaste aktørane for at vi skal få gjennomført eit så stort arrangement som Jul i Stallen er, seier Endal.
Variert tilbod
Under helgas arrangement er det mange aktivitetar som føregår parallelt; barneriding, stell av hest, vikingleir med leikar og andre vikingaktivitetar, eventyrstund, marknad med sal av handlaga produkt, køyring med hest og vogn, smådyrhjørne og kiosk. I tillegg vil det vere to framsyningar med hest-, sirkus-, og vikingshow begge dagane.
– Vi håpar mange har lyst å ta turen for å få med seg alle desse fine førjulsopplevingane, i tillegg til at ein er med på å støtte ei god sak, seier Siri Endal.
Grunnleggande verdiar
Ho seier dette om bakgrunnen for at ein starta med Jul i Stallen.
– I 2013 fann vi på Fjordane Folkehøgskule ut at vi hadde lyst til å lage eit felles prosjekt for alle elevane på skulen, der vi samarbeida på tvers av dei ulike linjene. Vi hadde lyst å gje noko tilbake til lokalsamfunnet sidan folkehøgskulen er ein viktig del av Nordfjord, både som arbeidsplass og ved at skulen tilfører bygda rundt 80 nye ungdomar frå heile landet i ni månader kvart år, seier Endal.
– Vi meinte at det var viktig at dei som bur rundt oss fekk eit innblikk i det vi dreiv med, og at vi kunne gje dei nokre kjekke opplevingar i tillegg. Ein av dei andre hovudgrunnane til at vi ville sette i gang dette, var at vi hadde eit ønskje om å kunne at gjere ein ekstra innsats for organisasjonar som driv med viktig samfunnsnyttig arbeid. Formålet var altså å sette fokus på nokre grunnleggande verdiar, der det å jobbe saman for å gjere noko for andre var det som sto øvst på lista, noko som jula eigentleg bør handle om. Vi sette i gang eit storstilt prosjekt med å produsere ulike handlaga produkt, øve inn show og pynte stallen til jul, fortel Siri Endal.
Og laurdag og søndag blir altså Jul i Stallen arrangert for fjerde gong på fjordhestsenteret.
