– Seawalken er den siste store brikka i det samla sentrumsprosjektet i Eid der nybygg og storsatsing på handel, Sagaparken, Sagastad og seawalk med cruisetrafikk inngår. Dette gjer Eid til ein inngangsport for turisme i heile Nordfjord, seier Bjørlo. Han viser til at seawalk med cruisetrafikk og Sagastad er prosjekt som gjensidig styrkar kvarandre. Sagastad legg opp til å ta imot grupper med cruiseturistar som ein stor del av sitt kundegrunnlag. Det betyr veldig mykje at ein kan gå ut i verda og fortelje at Sagastad med verdas største vikingskip står klart om tre år.
Ifølgje Bjørlo er European Cruise Service allereie i full gang med å lansere Nordfjordeid og Nordfjord som cruisedestinasjon.
– Siste ord er ikkje sagt
Driftsavtale
Ordføraren legg vekt på at ei cruisekai på Eid gir fantastiske mogelegheiter for næringsutvikling, utvikling av handel, nye aktivitetar og opplevingar både her i kommunen og heile Nordfjord. Han peikar på at cruiseanløpa i all hovudsak skjer i vekedagane, og tilstrøyming av cruiseturistar i vil mellom anna kunne skape nye mogelegheiter for å drive lønsam handel i Eidsgata.
Bjørlo er glad for at løyve no er gitt, og seier at neste steg er å få på plass ein driftsavtale om bruken av kaia. Avtalen kjem til behandling i neste møte i formannskapet. Der vil det også ligge føre utgreiing om utmelding av Nordfjord Hamn.
Tilrettelagt for landstraum
Bjørlo er oppteken av at seawalken er tilrettelagd for landstraum, og lovar at når seawalken er på plass, vil det bli jobba med ein finansieringsplan for å få straumtilkopling. Han viser til at det er på trappene statlege støtteordningar, og at ein må i dialog med SFE når det gjeld å tilgang på nok straum for å kunne forsyne dei største skipa.
– Langsiktig arbeid
– Cruisekai er ikkje ein flygeidé som nokon har kome på no. Det er ikkje noko som har poppa opp plutseleg. Det er eit resultat av ti års langsiktrig og breitt politisk arbeid gjennom fleire kommunestyreperiodar der målet har vore å få på plass ei cruisekai, seier ordføraren og viser til at kaia har lege inne i kommunale planar og strategiar sidan 2006.
Eid-ordføraren understrekar også at seawalksaka har vore handsama «heilt etter boka».
– Har ingen betydning
Samstundes som Teknisk- og samfunnsutvalet i Eid gjorde sitt vedtak torsdag, behandla Porsanger kommune sak om å ta opp eit lån på 35 millionar kroner for å kjøpe den same seawalken som Eid kommune har hatt tilbod om.
Naboane i Hola følgde behandlinga i Porsanger direkte via nett. Dei følgde også behandlinga i Teknisk- og samfunnsutvalet i Eid og sa til Fjordabladet like etterpå at dei sette sin lit til at Porsanger kommune ville kjøpe seawalken.
Ordførar Alfred Bjørlo seier til Fjordabladet at vedtaket i Porsanger ikkje vil ha innverknad på kva som skjer i Eid.
– Vi har ein skriftleg avtale om seawalk. Byggetida er på 5-6 månader, og seawalk i Eid kjem på plass uavhengig av kva som skjer i Porsanger. Kommunen sitt bidrag står fast, slår Bjørlo fast.
Ordførar i Porsanger Aina Borch stadfestar at dei har vedteke å låne 35 millionar kroner til seawalk. Porsanger ein ROBEK-kommune og avtalen er sendt over til Fylkesmannen for godkjenning. Dei har blitt lova raskt svar.
Porsanger kommune har førebels ikkje på plass ein godkjend reguleringsplan der seawalk ligg inne, men Borch fortel at kommunen jobbar med dette med sikte på å kunne få på plass seawalk til 2017-sesongen.