Torsdag 25.august gjekk Vegkonferansen nord-sør-aust-vest av stabelen i Førde. Formålet med konferansen var å få fram kunnskap om viktige samferdsleprosjekt, byggje alliansar og meisle ut felles strategiar i kampen om viktige samferdsleprosjekt på E39, E134, Rv. 5 og Rv. 52.

Fylkesordførar Jenny Følling opna vegkonferansen med klar adresse til avgjersletakarane i regjeringa og på stortinget.

– Sogn og Fjordane er heilt klare i sine prioriteringar; vi står samla bak både vidare utbyggingstakt på E39, Rv. 5 og ikkje minst Rv. 52 Hemsedalsfjellet. Vel den samferdsleløysinga som tenar heile Vestlandet, nemleg kombinasjonen av Rv. 52 Hemsedalsfjellet og E134 Haukelifjell med arm til Bergen, sa Følling.

Sentrale avgjersletakarar som Nikolai Astrup, leiar av transport- og kommunikasjonskomiteen på Stortinget, medlem av same komite Magne Rommetveit, vegmyndigheitene ved regionvegsjef Helge Eidsnes og senioringeniør Kjell Kvåle i Statens vegvesen og leiar i Noregs lastebileigar forbund (NLF), Geir A. Mo var alle på lista over føredragshaldarane.

– Ikkje bestemt

– Vi har meir å gjere med norske vegar. Vi treng fleire vegar og betre vegar, sa Astrup i sitt innlegg. Han var tydeleg på at dei ikkje har bestemt seg for om dei skal lande på Rv. 52 Hemsedalsfjellet eller Rv. 7 Hardangervidda slik nokre har hevda.

– Når utgreiinga frå Statens vegvesen føreligg vil det vere grunnlag for å gjere eit val. Omsynet til næringstrafikken vil i alle høve vege tungt når endeleg avgjersle skal takast, sa Astrup i sitt innlegg.

Konferansen var arrangert av E39 stamvegutvalet, Interesseselskapet for Rv. 52 aust-vest, Hordalandsdiagonalen og E134-alliansen og samla samferdsleaktørar frå heile Vestlandet og store delar av Austlandet.

NLF tydelege

NLF, ved Geir A. Mo, var heilt tydelege på at Rv. 52 Hemsedalsfjellet og E134 med arm til Bergen er transportnæringa sitt føretrukne val. Mo la også vekt på at veksten i godstransporten vil komme på veg, noko som i sin tur aukar behovet for vidare vegsatsing både i høve vedlikehald og investeringar. E16 Arna-Voss og rassikring på E16 gjennom Gudvangen er også av avgjerande tyding for NLF.

Frå næringslivsleiar og tidlegare banksjef i Sparebanken Sogn og Fjordane, Arvid Andenæs, fekk konferansedeltakarane servert eit føredrag om kva gode vegar betyr i eit litt breiare samfunnsperspektiv.

–  Vi må markedsføre Vestlandet som det området som skal skape velferda gjennom vekst og næringutvikling inn i det neste århundret. Nyskaping er vegen til framtidig velstand. Raske, gode og fleksible transportvegar er ein viktig del av dette.

Vegkonferansen i Førde er den siste viktige møtestaden for samferdsleforkjemparane i høve fjellovergangar aust-vest før Statens vegvesen legg fram sine konklusjonar omkring KVU Gol-Voss 1.september. Når det gjeld E39-prosjekt og prioriteringar av desse vil dette vert ein politisk kamp inn mot handsaminga av Nasjonal transportplan 2018-2029.