Minnemarkering for dei omkomne etter MH17

Over 2.000 pårørande er med i avdukinga av minnesmerket for offera frå nedskytinga av eit fly frå Malaysia Airlines over Aust-Ukraina for tre år sidan. 

Måndag er det tre år sidan 298 menneske om bord i rute MH17 frå Malaysia Airlines mista livet, då flyet blei skote ned av ein russisk rakett over Aust-Ukraina.

Over 2.000 pårørande og etterlatne av dei omkomne, som kom frå 17 ulike nasjonar, vil vera til stades under avdukinga av minnesmerket nær Schiphol flyplass i Amsterdam.

Også Nederlands kong Willem-Alexander, dronning Maxima, og den nederlandske regjeringa blir med under seremonien i Vijfhuizen-parken.

Til saman er det planta 298 tre for dei som mista livet. Trea er planta i ei sløyfe og omkrinsar ein skulptur i midten – eit auga av stål som skodar opp mot himmelen.

MH17 var på veg frå Schiphol-flyplassen i Amsterdam til Kuala Lumpur i Malaysia då det styrta i nærleiken av opprørskontrollerte Donetsk i Aust-Ukraina 17. juli 2014.

I fjor konkluderte etterforskinga med at ein rakett skoten opp frå området trefte passasjerflyet. Ei mobil oppskytingsrampe skal ha blitt frakta over grensa frå Russland, for deretter raskt å ha blitt frakta tilbake etter nedskytinga av flyet.

Både regjeringa i Russland og prorussiske opprørarar i Ukraina har avvist denne konklusjonen.

Tidlegare har amerikansk etterretning uttalt at dei prorussiske opprørarane truleg skaut ned passasjerflyet ved ein feil.

I alt 1.000 personar er etterlyst i samband med nedskytinga. Men ingen er så langt arresterte.

(©NPK)

Siste nyhende

Facebook vil gi brukarane høve til å spore russisk propaganda

Facebook vil opprette ein funksjon som gjer det mogleg for brukarane å sjå om dei har følgt eller likt innlegg frå falske, russiske profilar.

FN: Færre flyktningar har komme frå Libya etter EU-avtale

Talet på flyktningar som har nådd Italia via Libya, har falle kraftig sidan EU inngjekk ein omstridd avtale med libyske styresmakter, opplyser FN.

Syrisk opposisjon gjentar krav om Assads avgang

Ei gruppe syriske opprørs- og opposisjonsgrupper krev enda ein gong at president Bashar al-Assad må gå av.

Argentinsk marine: Ubåt kan ha vore ramma av eksplosjon

Ein eksplosjonsliknande lyd vart registrert rett etter at den argentinske ubåten med 44 menneske om bord forsvann for ei veke sidan, opplyser marinen i landet.

Rwanda vil ta imot 30.000 migrantar utsette for slavehandel i Libya

Rwanda kunngjer at dei vil tilby seg å ta imot rundt 30.000 flyktningar som har vorte utsette for slavehandel av væpna grupper i Libya.