Giro d'Italia-opning i Israel

Dei tre første etappane av neste års Giro d'Italia er lagt til Israel.

Det bekrefta arrangørane sjølv onsdag. Det blir første gong i historia at starten på det første trevekersrittet i sykkelsesongen går utanfor Europa.

Opninga av Tour de France har ved fleire høve vore lagt utanfor Frankrikes grenser. Storbritannia, Nederland og Tyskland er blant landa som har vore arrangør. Det same har også vore tilfelle for både Giroen og Vuelta a España.

I 2012 vart Giro d'Italia innleidd i Danmark med tre etappar.

Giro-arrangørane opplyser at detaljane rundt etappane vil bli offentleggjort i neste veke. Statsrådar frå Italia og Israel skal stå for sjølve kunngjeringa saman med den spanske sykkellegenden Alberto Contador.

Sistnemnde avslutta karrieren med etappesiger på den nest siste etappen av Vuelta a España nyleg. Samanlagt vart han nummer fem i avskjeden.

Nederlandske Tom Dumoulin gjekk til topps i Giro d'Italia i år. Sigeren var den første Grand Tour-triumf nokon gong for Sunweb-syklisten.

På plassane bak seg hadde Dumoulin colombianske Nairo Quintana og italienske Vincenzo Nibali. Sindre Lunke var einaste norske deltakar.

(©NPK)

Siste nyhende

Hoppjentene får lagkonkurranse i NM

Norges Skiforbund innfører lagkonkurranse for kvinner under hopp-NM i mars.

IOC stengjer ute fire nye utøvarar etter Sotsji-OL

Den russiske vinnaren i skeleton frå Sotsji, Alexander Tretjakov, er éin av fire nye utøvarar som ikkje får delta i OL i framtida.

Zlatans sko selde for nesten 300.000

Skoa Zlatan Ibrahimovic brukte då han scora fire mål mot England i 2012 er selde for 282.000 kroner.

Skiforbundet lanserer mentorprogram for kvinner

Skipresident Erik Røste vil ha fleire kvinnelege trenarar og leiarar. No kjem kvinneløftet i Norges Skiforbund.

Klart for Svindal-comeback

Noreg sender 19 utøvarar til dei kommande verdscuprenna i alpint i USA og Canada. Aksel Lund Svindal gjer comeback etter skade.