Stemninga er på topp. Kvar fredag er bollefredag – eit svært populært tiltak, der elevane stiller seg i kø i kantina for å få tak i rykande ferske og digre bollar.
Kameratane Rune Hellenes, Olav Hopland Johnsen, Esekiel Hagen Henden og Henrik Vingen Vedeld hiv i seg kvar sine bolle, medan dei skryt uhemma av skulen dei går på.
– Folk bør søke på Eid vgs, er den klare oppfordringa frå karane.
– Her er så bra læringsmiljø, meiner Olav.
– Eg prøvde meg først i Stryn, men så kom eg hit. Det angrar eg ikkje på, fastslår Esekiel.
– Her er så mange flinke lærarar, som vil at vi skal gjere det godt. Og så er her mange moglege linjer å velje i, som legge til rette for det meste, seier gutane.
– Eid er best, det er berre sånn det er, meiner Henrik.