Namn: Håvard Nyheim
Fødd: 15. april 1988/sjukehuset Nordfjordeid
Bur no: Flatraket
Budde før: Bergen
Utdanning: Elektroteknikar frå Fagskulen i Bergen
Stilling: anleggsleiar i Kraftmontasje AS
Sivil status: Sambuar med Tonje Renate Lillesalt
Barn: Oda Lillesalt Nyheim( 2 år i september)
Bil: Volvo og Audi
Kjæledyr: Ingen
Aktuell: flytte heimatt og bygde hus på Flatraket(snart Stad kommune)
− Kvifor valde du å flytte tilbake til heimplassen?
− Vi flytte heim for å komme nærare familien og vi venta ei lita jente. Flatraket er ei god bygd å vekse opp og bu i.
− Kva var mest avgjerande for flyttinga?
− Mest avgjerande var at vi sakna familie og vener og at vi ville byggje eige hus.
− Kva sakna du mest då du budde borte?
− Flatraket på fine sommardagar.
− Er det noko spesielt du brenn for på heimstaden?
− Samhaldet mellom sambygdingane og det flotte idrettslaget som har aktivitetar for alle aldersgrupper.
− Korleis er livet ditt om ti år?
− Då er eg godt etablert familiefar som gler meg over at Stad skipstunell endeleg er realisert.
− Kva skulle du bli då du var 12–14 år?
− Draumen var å bli fotballspelar eller gravemaskinførar.
− Kva er du mest fornøgd med i livet ditt no?
− Å kunne nytte finvêret i lag med familien?
− Kva er det verste du veit?
− Grantrea til naboen som gjer at eg misser mesteparten av solnedgangen.
− Kva er den største forskjellen på livet i Bergen og livet på Flatraket?
− Vi manglar mange tilbod som Bergen har, men her i feel-good-bygda kjenner vi faktisk naboane i motsetning til i Bergen. Samhaldet blir betre på mindre plassar.
− Kva har opptatt deg mest i det siste?
− Huset vi har bygd.
− Kva synest du om Stad kommune?
− Eg synest Eid har hatt ei positiv utvikling og satsar bra som handelssentrum. Håper samanslåinga kan ha same effekt på Selje kommune. Skal folk flytte heim treng vi utvikling og satsing i nærområda og etablering av spennande og freistande jobbtilbod. Trur det som hindrar fleire frå å flytte tilbake er mangelen på utdanningsrelaterte jobbar.
− Kan du tenkje deg å engasjere deg i kommunepolitikken?
− Ja, det er viktig å kunne bidra til å utvikle samfunnet i ei positiv retning.
− Kva synest du om jobbtilbodet i distriktet?
− Vi må støtte og jobbe aktivt for dei som har lyst til å skape nye arbeidsplassar. Per dags dato er det for lite jobbar til å skape den tilflyttinga som er ynskjeleg.
− Er det noko du saknar i Nordfjord?
− Badeanlegg for dei minste. Viktig at dei får lære seg å symje når vi bur i ein kystkommune.
− Føler du at du har fått realisert deg sjølv?
− Eit godt stykke på veg. Men ennå har eg meir ugjort på «Bucket-lista» mi.
− Kva råd har du til andre utflytta nordfjordingar?
− Start familie og flytt heim! Vi treng dokke.
− Kva synest du om «nye» Nordfjordeid?
− Eg likar det dei har fått til.
− Kva er favorittserien på TV?
− Det blir lite tid til TV, men ser på forskjellige seriar i lag med fruen.
− Kva medium brukar du for å oppdatere deg på nyheitene?
− Mobil, PC og aviser.
− Har du eit råd til kommunepolitikarane?
− Bruk budsjettmidlane vi har til rådigheit. Skjønar ikkje kvifor Selje kommune skryter av eit overskot når vi ser på behovet for oppgraderingar og manglande drift i kommunen.
Sats på befolkninga!
− Kvar går årets ferietur?
− Det har vi ikkje bestemt ennå.
− Kva har du på nattbordet?
− Mobilen og nattbordslampe.