Leiar i laget, Marita Røyset, fortel at dei viser spinning, farging, knipling, brikkevev, sprang, grindvev og reipslaging. Alt gamalt handverk, men ikkje er like godt kjende blant folk.
Marita Røyset trur at gamalt handverk er meir i tida no. Husflidslaget har eige hus på Plassen, og ho opplyser at aktivitetsdagen og er litt for å vise huset og marknadsføre gamle teknikkar. Her er det ein god plass å treffe folk, ettersom det er mange som går her i ulike ærend, og det er ikkje vanskeleg å få folk i tale.
Røyset fortel at Eid Husflids-lag no har 24 vaksne medlemmer og 14 barnemedlemmer. Ho ser gjerne fleire unge i laget, og lovar eit kreativt miljø.
Eldgammal teknikk
Sprang eller bregding er handarbeid etter ein eldgamal teknikk, og Bodil Johnson er ein av dei få som meistrar dette og har mange års erfaring med sprang. Ein set trådane på ei ramme og flettar trådane saman til eit band eller eit stykke stoff. Det kan lagast mange ulike ting med denne teknikken: blondar, gardiner og til og med klesplagg.