Namn: Martin Anders Nygård
Bur no: Flatraket
Budde før: Colorado(2 år), Ålesund(3 år) og Stavanger(2 år)
Fødd: 25. mars 1989 på sjukehuset Nordfjordeid
Utdanning: Sivilingeniør – kybernetikk, automasjon og signalbehandling
Stilling: Systemutviklar og teknisk driftssjef i Paneda DAB AS
Sivilstatus: Sambuar med Mari Greidung
Barn: Nora – 15 månader og ventar barn i slutten av august
Bil: Toyota Auris og Toyota Corolla
Kjæledyr: Nei
− Kvifor har du valt å flytte tilbake til Flatraket?
− Eg ynskte å flytte tilbake til Flatraket fordi eg og sambuaren min var klare til å stifte familie og få barn. Foreldra mine bur der, og dei kan hjelpe til med barnepass. I tillegg er Flatraket ein fin plass for barn å vekse opp.
− Kva var mest avgjerande for flyttinga?
− Trivsel og familie.
− Kva sakna du mest då du budde borte?
− Solnedgangen i havet, båtlivet og bygdeoriginalar.
− Er det noko du brenn for på heimplassen?
− Samhaldet i bygda.
− Korleis er livet ditt om ti år?
− Gift og lukkeleg familiefar.
− Kva skulle du bli då du var 12/14 år?
− Det var eigentleg skodespelar i Hollywood.
− Kva er du mest fornøgd med i livet ditt no?
− Situasjonen eg er i – lukkeleg småbarnsfar med herleg sambuar og fin familie rundt meg.
− Kva er det verste du veit?
− Utanlandske bubilar på feil side av vegen.
− Kva er den største forskjellen på bylivet og livet på Flatraket?
− Du har ikkje alt tilgjengeleg rett utanfor døra. I staden har vi flott urørt natur med muligheit for fjellturar, jakt og fiske.
− Kva har opptatt deg mest i det siste?
− Utvilsamt husbygging som både eg og far min har brukt mykje tid og energi på, for å få ein fin heim til familien min.
− Kva er fordelar og ulemper med Stad kommune?
− Fordelen er at det blir spart pengar på administrative stillingar i kommunen. Den største ulempa er at det kan kvele barneskulen på Flatraket.
− Kan du tenkje deg å engasjere deg i kommunepolitikken?
− Det er viktig å engasjere seg. Dersom ein ynskjer forandringar må ein vere med å bestemme.
− Kva synest du om jobbtilbodet i distriktet?
− Det er ganske bra. Her er mange bedrifter som er villige til å satse, og det synest eg er veldig positivt. For min del har eg ei brei utdanning, så eg har litt å velje mellom. Mest interessant i høve til utdanninga mi er velferdsteknologi og robotprogrammering, men det er det ikkje så mykje av her.
− Saknar du noko i Nordfjord?
− Burger King klokka 23.00 ein laurdagskveld. Gjerne muligheita til å gå ut ytterdøra og trakke i gata for å sjå på livet og møte nye menneske.
− Føler du at du har fått realisert deg sjølv?
− Både ja og nei. Ønske om eigne barn har gjort at eg har sett både reiselyst og eventuell vidareutdanning på vent.
− Råd til utflytta nordfjordingar?
− Kos dokke borte, kom heim til slutt, start familie og hald liv i bygdene.
− Kva synest du om «nye» Nordfjordeid?
− Det er utruleg bra kva Nordfjordeid har fått til. Satsing på nye tomter, nye butikkar og kjøpesenter, skaper moglegheiter for unge som ynskjer å komme heim. Vi reiser ofte til Nordfjordeid for å handle sidan der er så godt utval av butikkar.
− Kva er favorittserien?
− Friends.
− Kva nyhendemedium brukar du?
− VG, NRK, BT, DN, TU og FJT.
− Råd til kommunepolitikarane?
− Stå på og ikkje la folk bak tastaturet på sosiale medium knekke deg eller hindre deg i å jobbe for det du brenn for.
− Kvar går årets ferietur?
− Det vert truleg ein tur til Sverige.
− Kva har du på nattbordet?
− Mobilen.