Heggrosa 4H i Heggjabygda har berre 11 medlemmer. I helga inviterte dei rundt 70 unge på leir.
Inger Træen inger@fjordabladet.no
Oppdatert:
Heggrosa er kanskje den minste 4H-klubben i fylket. Det hindrar dei ikkje i å arrangere leir for 73 4H-arar frå seks klubbar. I helga var det teltliv, underhaldning og aktivitet frå fredag ettermiddag til søndag ved grendahuset i Heggjabygda. Dei eldste i klubben og tidlegare medlemmer tok seg av aktivitetar. Medan klubbrådgjevar Torill Kufaas Karlsen og dugnadsgjengen på rundt femten har planlagt i fleire månader.
– Det har vore ein draumeleir. Ikkje minst fordi så mange hjelper til og det er ingen som seier nei, kunne klubbrådgjevar Kufaas Karlsen oppsummere.
Klubben starta med planlegging ikkje så lenge etter jul. Sidan då har det vore mange møter og mykje arbeid for å få det heile i boks.
– Vi har hatt ein god plan og erfarne folk med på laget. Når ein ser at leiren blir gjennomført nesten prikkfritt og alle kosar seg får ein løn for strevet. Ein får mange gonger igjen for det arbeidet som er lagt ned, seier Kufaas Karlsen.
– Vi ser at det betyr noko for dei unge å få vere med på ein slik leir. Det byggjer både samhald og god sjølvkjensle for barna, seier ho.