Formannskapet i Volda vedtok nyleg å legge planprogram for kommunedelplan og konsekvensutgreiing for bru over Voldsfjorden ut på høyring og ut til offentleg ettersyn.

I forslag til planprogram er det vist tre alternativ som skal utgreiast som del av planarbeidet:

Alternativ 0 – Situasjonen som i dag,

Alternativ 1 – Flytebru Krumsvikneset – Greifsneset og

Alternativ 2 – Flytebru Folkestad–Andaneset.

På det smalaste

I planlegginga av ferjefri kryssing av Voldsfjorden er det altså to hovudalternativ for kryssing vurdert som aktuelle. Det er Krumsvikneset–Greifsneset og Folkestad–Andaneset. På desse stadane er fjorden på det smalaste og brukostnaden vil dermed bli lågast. Sjølve brutraséane er dermed relativt låste, medan vegtilknytinga på land vil variere om ein vel høg eller låg bru på Greifsneset og Andaneset.

Underalternativ med sluse

Begge hovudalternativa har underalternativ med sluse som kan opnast for skipstrafikk eller seglingsløp nær land på austsida av fjorden. Dette opnar for fleire løysingar for å knyte brua til vegnettet.

Alternativ 1A: Kryssing av fjorden med flytebru med skipssluse mellom Krumsvikneset (på Folkestadsida) og Greifsneset (på Voldasida), og ny tunnel med tilknyting til E39.

Alternativ 1B: Kryssing av fjorden med flytebru mellom Krumsvikneset og Greifsneset med fast seglingsløp nær land på Greifsneset. Brua knyter seg til eksisterande veg i rundkøyringa på lokalvegen mellom bebyggelsen på Greifsneset og E39.

Alternativ 2A: Kryssing av fjorden med lågbru og skipssluse mellom Folkestad og Andaneset med ny veg i dagen og tunnel med tilknyting til E39 på Rotset.

Alternativ 2B: Kryssing av fjorden med flytebru mellom Folkestad og Andaneset med fast seglingsløp nær land på Andaneset. Vegtilknyting til eksisterande vegnett med veg i dagen frå Andaneset til Rotset.

Som del av arbeidet med planprogrammet er det teikna framlegg til tilkopling mellom bru og eksisterande vegnett på begge sider av fjorden, som grunnlag for vurdering av konsekvensar. Det er utarbeidd geologisk rapport for aktuelle stader for tunnelpåhogg og for ny veg i dagen.

Fjordkryssinga er planlagt finansiert primært med tilgjengelege offentlege finansieringsordningar og bompengar.

Erstatte ferja

Hovudføremålet med planarbeidet er å leggje til rette for å erstatte ferja Volda-Folkestad med brusamband over Voldsfjorden. Riksveg 651 (alternativ til E39) går i dag mellom Volda og Folkestad med ferje. Vidare sørover frå Folkestad går Rv 651 (alternativ til E39) gjennom Stigedalen til Nordfjordeid.

Gjennomføring av prosjektet skal knyte nordre og ytre delar av Nordfjord og Søre Sunnmøre saman i ein bu- og arbeidsmarknadsregion og medverke til at kommunikasjonen internt i

Volda kommune vert betre. Nedkorting av reisetidene er viktig også fordi sjukehuset på Nordfjordeid ikkje har tilbod til fødande, og ein del nyttar Volda sjukehus.

40 km kortare

Bru over Voldsfjorden vil korte den ferjefri køyreavstanden til Eid, Gloppen, Vågsøy og Selje med om lag 40 km. Fleire lokalsamfunn vert knytte i hop, og det vert enklare å dagpendle og enklare å nå gode skule- og kulturtilbod.

Kryssing av Nordfjorden

Kommunane Eid og Gloppen har utarbeidd interkommunal kommunedelplan for kryssing av Nordfjorden med bru mellom Anda og Lote. Dette er grunngjeve med at Anda – Lote vil ha stor trafikk også i framtida.

Planen vart vedteken i kommunestyret i Eid 9. november 2017 og i Gloppen 18. desember 2017.

Kommunal- og arbeidsdepartementet aksepterte i 2015 at Eid kommune har lagt inn brutrasé i kommuneplanen, trass i motsegn frå Statens vegvesen.

E39-bru i Stryn

Det er politisk bestemt at framtidig E39 skal følgje ein indre trase gjennom Stryn, med bru over fjorden der.