Spansk storavis: Ødegaard trente utan problem – kan bli kampklar

Martin Ødegaard skal ha delteke for fullt på Real Madrids trening fredag. Søndag er det kamp mot gamleklubben Real Sociedad.
sport

Det er den spanske storavisa Marca som fredag skriv at Real Madrid-trenar Zinédine Zidane fekk positivt skadenytt på treninga to dagar før det som er sesongopninga til storklubben.

Avisa fortel at Ødegaard trente «utan problem» og at «det synest som om han kan bli klar» til å bidra i kampen på søndag.

Ødegaard har slite med jumpers knee i lengre tid, og nyleg var han òg litt småsjuk.

– Han har vore uheldig og vore litt småsjuk dei siste par dagane. Han er testa mange gonger og er koronafri, sa onkelen Thomas Ødegaard til NTB måndag.

Onsdag stadfesta Real Madrid på nettsidene sine at nordmannen var tilbake i trening.

Real-trenar Zidane må setje saman eit lag utan fleire sentrale spelarar til kampen på søndag mot Real Sociedad. Marco Asensio, Isco og Eden Hazard er alle uaktuelle. Lucas Vasquez og Eder Militao er uvisse kort.

Ødegaard hadde ein sesong på lån i Real Sociedad og vart henta tilbake til Madrid i sommar. Søndag kan han vere tilbake på den tidlegare heimebanen sin i San Sebastian.

Det er venta at Real Madrid tek ut troppen til kampen laurdag.

Den spanske storklubben spelte ikkje då mange av La Liga-kollegaene serieona sist helg. Ødegaards arbeidsgivar er éin av fleire klubbar som vart innvilga ei ekstra veke med sommarpause.

(©NPK)