Sjå opp for Kerr, men gløym ikkje De Vanna

Sam Kerr får fortent mykje merksemd før Noreg møter Australia i VM-åttedelsfinale laurdag, men det er viktig og ikkje gløyme Lisa De Vanna.
sport

34-årige De Vanna plaga Noreg i dei to tidlegare møta til laga i VM-sluttspel, med mål og ein assist som kosta dei norske dyrt.

– Lisa har eg hatt i klubblaget, så henne kjenner eg veldig godt. Ho er ein interessant spelar på mange måtar, men ho byrjar å komme litt opp i åra og er ikkje like sylkvass som ho ein gong var, seier Martin Sjögren til NTB.

Landslagssjefen var De Vannas trenar i Linköping i 2012. Det er ein av den lange rekka hennar av klubbar, der opphalda har vart høgst ein sesong og ofte mindre.

Herja

I VM-sluttspelet i Kina i 2007 tok Noreg tidleg leiinga over Australia, men den gongen kom 22-årige De Vanna inn ved pause. Ho skapte kaos i det norske forsvaret og sette inn eit fortent utlikningsmål i sluttminutta.

Fire år seinare scora Elise Thorsnes leiarmålet i VM-kampen mot Australia, som Noreg måtte vinne. Eitt minutt seinare fekk De Vanna ei lang tå på ballen, vann den frå Trine Rønning og spelte fram Kyah Simon til utlikningsmålet. Etter eit Rønning-frispark i krysset og ut i sluttminutta sette Simon spikaren i den norske kista rett før slutt.

– Lisa er ikkje like eksplosiv som ho var, og det er fullt forståeleg, men ho er framleis ein veldig god spelar. Ho har ekstremt mykje erfaring, seier Sjögren.

Mange farlege

Spelaren med 150 landskampar er berre ein av spelarane Noreg må sjå opp for. Om dei rettar all merksemd mot Kerr, som scora fire mål mot Jamaica tysdag, kan det bli kostbart.

– Vi må tette igjen bakover, men stopparane våre og Ingrid (Hjelmseth) har vore veldig bra. Vi må få det offensive til å sitje litt betre enn sist og klare å halde meir på ballen så vi slepp å springe så mykje mellom, seier Guro Reiten om kampen på laurdag.

(©NPK)