Fjellskikkprisen til eldsjeler i Jotunheimen

Tor Varpestuen og Ingeborg Ørslien har fått Fjellskikkprisen 2019 for arbeidet sitt for beredskap i fjellområda i Sør-Noreg.
innenriks

Varpestuen og Ørslien driv fjellhytta Sikkilsdalsseter i Skåbu i Jotunheimen.

– Tor og Ingeborg har vist ein ekstrem vilje til og interesse for å fremme beredskapen i fjellheimen ved å opne opp for realistiske øvingar på og ved områda sine i Skåbu. Dei to peika seg ut i nominasjonsprosessen, seier president Robert Mood i Røde Kors, som står bak Fjellskikkprisen.

Varpestuen og Ørslien har lagt til rette for kursverksemd og beredskapsøvingar ved Sikkilsdalsseter.

«Redningstjenesten er helt avhengig av at både det offentlige, grunneiere og privat næringsliv tar ansvar for at de frivillige både får øve og fri til deltakelse på redningsoppdrag. Tor og Ingeborg spilte en nøkkelrolle da øvingsområde for førerkortklasse S for snøscooter ble etablert i området. Tor og Ingeborg er gode forbilder som tradisjonsbærere for tur- og kulturtradisjonene i fjellet og som støtteaktører for den frivillige redningstjenesten», heiter det i grunngivinga frå juryen.

I juryen for Fjellskikkprisen sat landsrådsleiar Kjersti Løvik i Røde Kors Hjelpekorps, president Robert Mood i Røde Kors og fagsjef Anne-Mari Planke, som er representant for vinnaren i fjor, Den Norske Turistforening (DNT).

Blant tidlegare vinnarar er òg dronning Sonja, Lars Monsen og Cecilie Skog.

(©NPK)