Dette lesarinnlegget er skrive av Ståle Sandal, leiar i Eid Idrettslag:

Tilsvar til Arne Roti

I artikkelen om banevedlikehald var mi meining å få fram at det er ein stadion i høgste grad tilpassa friidrett. Der er løpebane, kastanlegg i begge endar av bana, lengdegrop og plass til høgdestativ.

Så kan eg ikkje seie at eg har lest denne prosjektoppgåva, og eg er vaksen opp i Sogndal, så legg meg langflat om eg har bomma på kategoriseringa av vår Eid stadion.

Eg oppfatta utfordringa frå intervjuaren på kva vi tenkte om forfallet på banene i kring oss, og på Eid stadion er grasbana i svært god stand og hyppig i bruk.

Løpebana er det verre stilt med, men i sommar vart den slådda for å sikre treningstilhøve for folk flest. Vi såg då at bana truleg treng nytt toppdekke, for det er blitt veldig hardt med tida og det veks ugras i sanden grunna lite bruk.

Det var i denne samanheng eg uttala at vi ikkje har stemner som sikrar bruk av friidrettsdelane av stadion. Grunnen til at eg sa dette var at dersom vi hadde hatt treningar og stemner på arenaen, så hadde naturlegvis stadion og helde seg betre.

Vi vil gjere det vi kan for at vårt anlegg er tilgjengeleg for alle og i så bra stand som råd er.

Så vår haldning til friidrett er nettopp det ein her krev, vi vil gjere det vi kan for at vårt anlegg er tilgjengeleg for alle og i så bra stand som råd er.

Vi trur heller ikkje at lokalsamfunnets tilbod er noko vi kan greie åleine, difor valde eg skryte av det fantastiske arbeidet Haugen IL gjer for det folk flest ser på som typiske greiner i friidrett, og sa i den samanheng at dei har fått noko utstyr frå oss. Ikkje fråskriving av ansvar, berre ros til ein god nabo.

Vi kan love både Totland Olsen og Roti at Eid IL tek vedlikehald av stadion på høgaste alvor. Styret i fotballgruppa og andre involverte som snakkar med oss skryt av at vi er på ballen og gjer mykje bra. Sjølvsagt skulle vi gjort meir, men at vi sit på gjerdet ser vi ikkje som ein reell visualisering av vårt arbeid.

Vi er i gang med ei større kartlegging av framtidas anleggsstruktur i Nordfjordeid sentrum. Dette er eit stort og omfattande arbeid som kommunen har sett i verk, og gjennom dette skal Roti vere heilt trygg på at leiar i Eid IL gjer det han kan for at idretten skal vere eit sentralt fokus også i framtida i Nordfjordeid sentrum.

Her har vi oppretta eit godt team med Stad idrettsråd og Eid Idrettspark AS som samarbeidspartar for å få vekt på idretten sine behov i sentrum.

Avslutningsvis vil eg seie at vi skulle svært så gjerne sett av pengar og prioritert, men den pengesekken Roti trur vi har skal han gjerne få innblikk i.

Vi har teke nokre steg og skal halde fram utbetre anlegg for alle som ynskjer drive fysisk aktivitet for betre helse og velvære i vår flotte bygd.

Vi er utruleg takksame for alle som legg ned dugnadstimar for oss, og vi vil halde fram søkje midlar og med tida så håpar vi at vi får anlegga våre til å skine, slik at innlegga vert om kor flott vi har fått det kring oss i Eid idrettslag.

PS: Avtala med Vegvesenet/Mesta var før vår tid, så det vel vi ikkje kommentere.