Av: Nils Ola Liavaag Strand
I 180 år har ho stått der som eit landemerke i sentrum av Eid. Wieselada vart bygt i 1843 av Claus Wiese. Opp gjennom tidene har ho vore nytta til alt frå fjøs, stall, hønsehus, soldatbrakke, brennevinssal, saftfabrikk, skofabrikk, skomakarverkstad, garnbutikk og røyrleggarverksemd.
Då eg kom til Eid i 1969, var Wieselada nytta som skofabrikk. Då vinteren kom, tok eg turen innom Skofabrikken. Opp låvebrua og inn til venstre låg utsalet som var stappfullt av pappøskjer fylte med ulike slag fottøy. Eg kjøpte meg eit par flotte, svarte støvlettar til 105 kroner, innvendig fora med sauepels. Du verden, dette var andre saker å ha på føtene enn gummistøvlar. Attpåtil kortreiste, laga på Fjordane Skofabrikk på Eid!
Ein iskald søndag var det testing av desse nye støvlettane mine. Saman med klassekamerat Halvor Langset frå Åndalsnes gjekk turen frå Hermanslund til Fossane og tilbake på knallfin skaresnø. Støvlettane besto testen med glans! For min del vart dette første og siste turen til Fossane. Om nokon spør, seier eg berre: «Eg har vore der.» Eg nemner ikkje at det var i 1969.
Fjordane Skofabrikk heldt til i Wieselada frå 1950 og fram til 1975. Fleire av dei eg seinare arbeidde i lag med på Eid Verft, hadde jobba på Skofabrikken.
No vert Wieselada riven. Kva som kjem i staden er uvisst. Planar ligg føre frå SISA Invest AS ved tidlegare langrennsløpar Bjørn Dæhlie. "Bjørn Dæhlie er svært oppteken av miljøaspektet i heile prosessen, inkludert riving av eksisterande bygg på tomta", les eg i Fjordabladet. Og kva tenkjer eg? Så fint at Bjørn Dæhlie tenkjer miljø i vesle Stad kommune frå luksusbustaden sin i skatteparadiset Sveits!
Eit kjent og kjært landemerke vert borte, men minna om den no 180 år gamle Wieselada kan ingen take frå meg. Sjølv ikkje Bjørn Dæhlie.