Skrive av Anne-Britt Andersen:

Etter mi meining blir det feil å snakke om «berekraftig cruise» slik det gjort i StadMag desember 2022 og i kommunale diskusjonsdokument i samband med «næringslivets utval for berekraftig Nordfjordeid». Det er misbruk av ordet berekraft jamfør definisjon av ordet. Vi kan snakke om utvikling av meir berekraftig cruise og samanlikna med det vi har no.

Berekraft er definert i Store norske leksikon (fritt omsett til nynorsk): Berekraft er noko som passar med idealet om berekraftig utvikling. Berekraftig utvikling tilfredstillar behova til menneska som lever no utan å øydelegge framtidige generasjonar sine sjansar til å oppfylle sine behov.

I referatet frå møtet til «næringslivets utval for berekraftig Nordfjordeid» datert 19.01.23 står m.a. desse to punkta i ein presentasjon frå administrasjonen:

– Sertifisere Stad og Nordfjordeid som eit berekraftig reisemål

– Arbeide for ei grøn cruisehamn bygd på ein berekraftig cruisestrategi (sette tak på tal skip)

Kan Stad kommune sette tak på kor mange cruisebåtar som får vitje Nordfjordeid i ein sesong?

Det har nettopp vore ein sak i Stortinget om m.a. større råderett for kommunane når det gjeld tal på skip som får kome på vitjing pr. dag og pr. sesong. Det er partiet Raudt som har fremma saka i og den fekk ikkje fleirtal (referert i Fjordenes Tidene 07.02.23). Uavhengig av resultatet i Stortinget, håpar eg at kommunen vil arbeide for å sette eit tak, og at det blir lagt til rette for at alle innbyggjarane uavhengig av næringsinteresser, kan gje sitt syn på saka.

Helikopterturisme er ikkje ein del av ein meir berekraftig cruisestrategi. I Fjordabladet 27.01.23 får vi informasjon om at Fjord helikopter AS har søkt om konsesjon for å etablere og drive Nordfjoreid helikopterplass på industriarealet på Løkja. Dei ønsker å fly alle dagar i veka opp til 90 turar kvar veke. Det ligg allereie informasjonen på heimesida til Fonnafly om korleis turane frå Løkja er planlagt.

Artikkelen i Fjordabladet informerer om at det er Luftfartstilsynet som skal handsame søknaden om konsesjon. Kommunen skal gje høyringsuttale i saka. Kommunen har altså ikkje det avgjerande ordet når det gjeld etablering av Nordfjoreid helikopterplass på Løkja. Det er provoserande at dei som får alle ulempene med denne trafikken, berre kan formulere si meining i ei høyringsuttale.

Det er lokalval til hausten. Alle som har meiningar om cruiseturismen på Nordfjordeid, må utfordre dei politiske partia om korleis dei vil arbeide for meir berekraft i cruiseturismen no og i framtida.