Onsdag denne veka blei fylkesmeisterskapen i yrkesfag arrangert i Sogndal. Der 133 elevar konkurrerte i til saman 20 ulike fag.
Frå Eid vidaregåande skule var seks elevar med, der to av dei konkurrerte solo. Medan dei fire andre var med som som par. Både innan faga automasjon, industriell møbelproduksjon, Vg2 Design og dataelektronikarfaget gjekk Eid vidaregåande heilt til topps.
Best i automasjon
Innan faget automasjon var det Ingar Hjelle og Ole Kristian Vedvik som fekk ein 1. plass. Dei konkurrerte i ei klasse der det var åtte andre deltakarar, alle frå Eid vidaregåande skule.
Til topps i møbel
Innan programfaget Vg2 Industriell møbelproduksjon var det Audun Henden frå Eid vidaregåande som blei best. Han konkurrerte mot seks andre deltakarar, der alle kom frå Eid vidaregåande skule.
Dataelektronikar
I konkurransen Vg3 dataelektronikar var det Michael Berg og Mathias Øvreseth som gjekk til topps. Dei konkurrerte mot seks andre elevar, der to av dei kom frå Eid vidaregåande og fire frå Sogndal vidaregåande.
Design og handverk
Ingrid Alpen er elev ved Vg 2 Design, og blei best i dette programfaget, i konkurranse med fem andre elevar, alle frå Eid vidaregåande skule.
28 elevar frå Eid
Til saman var det 28 elevar frå Eid vidaregåande skule som var med i konkurransen. Dei konkurrerte også innan Vg2 Elektrikarfag og Vg2 Sveising.
Åtte skular
Til saman var det åtte skular med yrkesretta programfag med i konkurransen.
Det var Sogndal vidaregåande med 35 elevar, Mo og Øyrane vidaregåande (28), Eid vidaregåande(28), Stryn vidaregåande (13), Flora vidaregåande (12), Måløy vidaregåande (9), Høyanger vidaregåande (2) og Årdal vidaregåande med to elevar.
Frå Måløy vidaregåande gjekk Julie Nilsen Sundal frå Kjølsdalen til topps i Helsearbeidarfaget, i samarbeid med tre andre elevar.
