Eid kommune fekk sin kommunale musikkskule i 1987. Gjennom tretti år har godt over tusen elevar vore innom skulen, og om to dagar blir det jubiléum i Operahuset Nordfjord.
Då er både tidlegare elevar og tidlegare lærarar inviterte, og det blir ei rikhaldig program med tilbakeblikk på 30 år. Den som skal leie festen er dagens rektor, Dan Åsebø. Han har vore rektor ved skulen dei siste sju åra, sidan 2010. Før det har skulen til saman hatt fem rektorar der Kari Standal Pavelich og Unn Elin Carlsen har hatt lengst fartstid.
Ti år med planlegging
Då Eid kommune fekk kommunal musikkskule i 1987 hadde Gloppen hatt musikkskule i tretten år, sidan 1974. Musikkskulen i Gloppen var den første i Sogn og Fjordane. Om lag på same tid, først på 1970-talet, blei det oppretta musikkskule i Vågsøy. Bremanger fekk sin musikkskule i 1983.
Eid var dermed ganske seint ute i Nordfjord-samanheng med å få sin eigen musikkskule. Også på landsbasis var det fleire kommunale musikkskular som oppstod på 1970 talet.
Men då Eid omsider fekk sin musikkskule, var det etter ti år med planlegging. Allereie i 1978 var det ei nemnd i Eid som la fram ei innstilling om kommunal musikkskule. Ei ny utgreiing låg føre nokre år seinare, og det endelege grunnlaget for musikkskulen vart datert i mai 1986.
Den som gjekk i spissen for å få musikkskulen på plass var lærar Per Olav Halvorsen. Han hadde tidlegare vore lærar på Fjordane folkehøgskule.
Stor interesse
Men sjølv om det tok si tid for Eid kommune å få ein musikkskule på plass, vart det full fart og stor interesse då skulen endeleg såg dagens lys. Alt første hausten var det 120 elevar som gjekk i musikkskulen, og det blei undervist i 70 timar i veka.
Instrumenta frå oppstart var piano, kyrkjeorgel og gitar. Og etterkvart kom undervisning i el-orgel på plass. Dirigentar til kor og korps vart også innlemma i musikkskulen. I tillegg blei det satsa på musikkbarnehagar i Eid sentrum, på Stårheim og i Heggjabygda.
Populær musikkbarnehage
Primus motor Per Olav Halvorsen ivra for å starte med dei heilt yngste, for å opparbeide musikkglede i tidleg alder. Frå oppstart blei det difor etablert musikalsk barnehage med desentralisert tilbod.
Og i oktober 1987 kan ein lese at heile ni barn i Heggjabygda gjekk i musikkbarnehagen i bygda. Det var song og leik for dei små, øving i å lytte, bevege seg, konsentrere seg og litt instrumentopplæring med trening på rytmeinstrument.
Første elevane
Første time i musikkskulen blei gjennomført med undervisning i piano. Den kommunale musikkskulen hadde kjøpt inn splittert nytt instrument som stod klar til bruk. Dei første elevane som då skulle lære seg å spele piano var Håkon Hamre, Adelina Frislid og Wenche Kilvik. Pianolærar var Siri Angela Gamborg.
Elles blei det etterkvart kjøpt inn små feler til den første undervisninga og el-orgel. Andre instrument som til dømes gitar måtte elevane halde sjølve.
