Namn: Susanne Kroken
Fødd: 1990, Nordfjordeid
Utdanning: Årsstudium i Ungdomssosiologi og Pedagogikk, bachelor i sjukepleie, helsesøsterstudent per dags dato.
Yrke: Sjukepleiar, snart helsesøster
Familie: Singel, ingen barn
Bustad: Slettebakken, Bergen
Bil: Nei, reiser kollektivt
Husdyr: Nei
− Kvifor har du valt å bu i Bergen?
− I mine auge er Bergen Norges finaste by. Passeleg stor og passeleg liten for ein nordfjording.
− Kva skulle du bli då du var 14?
− I Topp-skuledagboka mi står det artist eller profesjonell dansar. Noko som er svært urealistisk etter som eg verken kan synge eller danse. Helsesøster har nok også alltid vore ein stor draum.
− Kva er draumejobben for deg?
− 100 % fast jobb som helsesøster er draumejobben i mine auge.
− Kva gjer du helst på fritida?
− Fjellturar om sommaren, og skiturar om vinteren. Gjerne i lag med ein stor venegjeng eller familie.
− Kva er favorittserien din på TV?
− Utan tvil Skam. Målgruppa er nok femtenåringar, men serien tek opp viktige og dagsaktuelle tema på ein opplysande og nyskapande måte.
− Kva bloggar brukar du å lese?
− Eg les ingen faste bloggar.
− Kor viktige er sosiale medium for deg?
− Dei er blitt mindre viktige dei siste åra. På ein skala frå 0–10 blir det 5, eller kanskje 6–7.
− Har du ein favorittforfattar?
− Pensumbøker har erstatta skjønnlitteraturen dei siste åra. Men eg likar å lese romantiske drama. Bøker av Jojo Moyes er favorittar.
− Kva er ditt favorittreisemål i sommarferien?
− Kunne gjerne tenkt meg å reise til Maui på Hawaii.
− Korleis finn du «den store roa»?
− Med ein kopp kakao på eit av byfjella. Gjerne med ein knekk sjokolade til.
− Kva diskar du opp med på venefest?
−Tapas og prosecco, og sjølvsagt ei kake til dessert.
− Kva er det sprøaste du har gjort nokon sinne?
− Å bestige Kilimanjaro var ei ganske sprø og vill oppleving.
− Er det noko du angrar på?
− Det må vere at eg ikkje var meir munnleg aktiv på vidaregåande. Eg hadde ein historielærar som på den tida var ganske oppgitt over det.
− Kva synest du om heimplassen din Eid?
− Eid er hjartet mitt. Eg er utruleg stolt over heimbygda mi.
− Lengtar du nokon gong tilbake til Eid?
−Ja, det gjer eg. Eg er svært heimekjær og torer å påstå at eg lengtar heim kvar dag.
− Kva trur du om livet ditt om ti år?
− Eg er nok verken artist eller profesjonell dansar. Kanskje har eg draumejobben som helsesøster heime på Eid.
− Bør Eid slå seg saman med Selje?
− Eg trur at Eid og Selje i framtida kan bli veldig bra. Saman er vi sterkare.
− Er det noko spesielt som har opptatt deg i det siste?
− Eg held på med siste innspurt på hovudoppgåva mi som omhandlar ungdoms seksuelle helse og prevensjonsbruk.
− Kva er det verste du veit?
− Negativitet og folk som pressar seg inn på bussen før ein har kome seg ut. Då må eg ofte telje til ti, kanskje tjue.
− Kva har du på nattbordet?
− Akkurat no er det ein hjartestein funnen i Osvika, eit bilete av tantebarna og sist men ikkje minst; metodebok for seksuell helse av Sex og samfunn.