Det er firmaet Saltex som er leverandørar og utfører arbeidet med skifte av kunstgrasdekket. Arbeidet starta onsdag førre veke.

– Det er heilt nødvendig med nytt dekke, spesielt for dei eldre spelarane som trenar mest. Det noverande dekket er nedslitt og altfor hardt. Vi har venta veldig lenge på nytt dekke, så no gler alle seg. Dette er som 17. mai for fotballen i Eid kommune, seier Jannicke Hagen Henden.

Ho er styreleiar i Eid IL Fotball og styremedlem i Eid Idrettspark. Der sit også leiar Oddvar Os og Ståle Sandal. Sistnemnde representerer kommunen i styret i idrettsparken. Som lærar ved Eid ungdomsskule er han klar på at nytt dekke er svært viktig også for skulane.

– Dette er det mest brukte idrettsanlegget i Eid kommune, og det viktigaste nærmiljøanlegget for ungdomsskulen. Idrettsparken blir utruleg mykje brukt av elevane, både til undervisning og i friminutta, seier Sandal.

Hovudarena

Eid Idrettspark er det klart mest brukte fotballanlegget i kommunen, og er i praksis hovudarenaen til Eid IL Fotball.

– Styret er samstemte på at vi må utvikle idrettsparken. Det er prekært behov for tribune, og vi skulle gjerne hatt klubbhus med garderobe og toalett, seier Hagen Henden.

Saka er løfta opp i hovudstyret i Eid IL.

– Vi er framleis på tankestadiet, men ønskjer å setje i gang ein prosess for å få dette realisert.

Ho kan ikkje seie noko om kva desse planane vil få å seie for Eid stadion, dersom dei blir realisert.

– Dersom vi lykkast med å få dette på plass, er det klart at vi ikkje kan satse fleire stader. Her vil eg understreke at det ikkje er tatt standpunkt til kva som skal skje med Eid stadion dersom vi lykkast med å utvikle idrettsparken, seier Hagen Henden.

Trapp og klokke

Ståle Sandal fortel at ungdomsskulen ønskjer å bygge ei trapp ned bakken til idrettsparken. Ein ønskjer også å få på plass ei permanent klokke.

– Det vil gjere det mykje enklare for skulen, seier Sandal.

Skifte av dekket er kostnadsrekna til 2,3 millionar kroner. Av dette går klubbane Eid og Haugen inn med 450.000 kroner, spelemidlar er på 780.000 og kommunalt tilskot 750.000.