Bør heller bruke Anda

Selskapet Scandinavian Skies har søkt om å få drive turistflyging med sjøfly, med opp til 40 turar for veka frå fjorden ved Nordfjordeid. Dette er ei satsing opp mot den planlagde cruisetrafikken i Eid. No reagerer bebuar i området, Rita Nyland, som meiner at ein bør heller nytte Sandane lufthamn til denne typen turistflyging.

Rita Nyland bur eit steinkast frå fjorden og den planlagde cruisesatsinga i Eid. No reagerer ho på at det også kan bli opp mot 40 turar med sjøfly i veka på Eidsfjorden. Tidlegare har ho gått hardt ut mot cruisesatsinga i området. Foto: Arkivfoto

Rita Nyland meiner ein sjøflyplass treng meir grundig vurdering i høve til tryggleik/miljø. Ho oppmodar om bruk av Sandane lufthamn i staden.

Nyland er huseigar og bebuar i Kaivegen, eit steinkast frå den planlagde seawalken og cruisesatsinga på Eid. Tidlegare har ho protestert mot cruiseanløp ved sentrum i Eid, og no er ho skeptisk til satsing på turisme med sjøfly. I eit brev til Eid kommune skriv ho at turistnæringa heller bør nytte seg av Sandane lufthamn, der det allereie er tilrettelagt i høve til tryggleik og beredskap og konsesjonen allereie er på plass.

Trangt om plassen

Nyland påpeikar også at det kan bli farleg og trangt om plassen når både ein cruisebåt, eit sjøfly og kanskje fritidsbåtar skal manøvre i hamna samstundes. Ho fryktar for tryggleiken og etterlyser ein beredskapsplan i høve til sjøfly, det same som ho har etterlyst i høve til cruisetrafikken. Nyland nemner også bølgjer på fjorden som gjerne kan oppstå om ettermiddagen sommarstid. Ho fryktar også endå meir støy for dei som bur i området.