Det har vore ein trist vinter for skifolket, men i dag er det ein fin vinterdag både på Harpefossen og på Tua/Fladalen.
Harpefossen Skisenter melder om flotte forhold. Det har kome rundt 10 centimeter puddersnø i natt, temperaturen viser tre minusgrader og vêret vekslar mellom sol og lette snøbyger. Det blir meldt om silkeføre i nypreparerte traséar.
I dag blir også heisen på Furuhogane opna. I tillegg er Enerskiheisen, tautrekket, minitrekk vest og Fjellheis J til mast 6 opne.
Turløypa innover Postvegen blir køyrt over med rull no i føremiddag, og ein vil prøve å legge spor. Lysløypa blir klar til i kveld, melder Harpefossen Skisenter.