Dagleg leiar i destinasjonsselskapet Visit Nordfjord, Marita Lindvik fortel i ei pressemelding at bakgrunnen for gjennomføring av merkevareprosessen er å samle Nordfjord under ein felles visuell profil, og skape eit felles vertskapsløft.

– Føremålet er å ta ein sterkare marknadsposisjon i norsk reiseliv nasjonalt og internasjonalt, samt styrke Nordfjord som bu- og arbeidsregion, og auke overrislingseffektane til andre næringar seier Lindvik. Ho oppmodar innbyggjarane, handels- og servicenæringa, reiselivsbedrifter og anna næring til å delta på ein inspirerande ettermiddag som forutan gode tankar om eit spanande samarbeid også inneheld underhaldning, lokal mat og drikke. Arne Hjeltnes, i tillegg til lokale kjente personar vil lose publikum gjennom ein spanande septemberkveld.

Klar og særeigen identitet

– Creuna sitt team med Arne Hjeltnes i spissen, har saman med ei breitt samansett gruppe med engasjerte nordfjordingar jobba fram ein felles profil, som skal gje Nordfjord ein klar og særeigen identitet tufta på våre fortrinn. Ei felles merkevare skal bidra til å skape engasjement, entusiasme og ein felles kultur hos reiselivsbedriftene og næringslivet elles, og for å lukkast må regionen stå samla understrekar Lindvik.

Betydelege ringverknader

Turistnæringa i Nordfjord er ei betydelig næring, som gjev ringverknader langt ut over reiselivet, og fører til verdiskaping og overrislingseffektar for andre næringar, og gjer regionen meir attraktiv som bu- og arbeidsstad. Det er fleire som vil nyte godt av satsinga, både dei tilreisande i regionen, reiselivsbedriftene, handels- og servicenæringa, anna næring, kommunane og innbyggjarane.

Attraktiv og innhaldsrik

Marita Lindvik legg vekt på at for å gjere destinasjonen attraktiv og innhaldsrik treng ein heile breidda og mengda som aktørane til saman kan tilby.

–  Regional marknadsføring lukkast best når ein har ei heilskapleg tilnærming. Kommunar, fylke, bedrifter og lokalsamfunnet må stå saman som ein heilhet og skape synergiar.

– Det er folket som skapar innhaldet i Nordfjord. Det er det vi skaper saman som gjer regionen attraktiv og innhaldsrik, og no har vi ein felles måte å fortelje om det på. Langsiktig samordna arbeid som gir resultat over tid er viktig, og må aldri undervurderast, avsluttar dagleg leiar i Visit Nordfjord, Marita Lindvik.