For første gong arrangerte Stårheim IL skiskyttargruppa og Haugen IL langrennsgruppa flakedans ved det nye skyttarhuset på Harpefossen. Dansen var no på laurdag, der 193 kjøpte billett. Arrangørane hadde sett opp ein eigen flake på det nyleg asfalterte «tunet» framfor skyttarhuset. Det var sett ut rundt 35 småbord og pynta med lys rundt området. Og på scena i ein lastebilhengar stod duoen SixPack med musikk som fekk folk til å prøve dansegolvet.
–Vi starta med dansen sann rundt klokka ni. Frå klokka elleve og utover var det fullt på dansegolvet, seier Nils Magne Nedreberg som er leiar for skiskyttargruppa i Stårheim IL. Saman med opp under førti andre i dugnadsgjengen hadde han jobba sidan torsdag kveld for å få gjennomført denne flakedansen.
Rundt 50.000 kroner
–Dette er ein bra oppstart. Vi fekk inn rundt 50.000 kroner, så no satsar vi på ein ny flakedans neste år. Då blir det tidlegare på sommaren, truleg siste helga i juni, seier Nedreberg som opplyser at inntekta skal gå til å betale ned gjeld på det nye skyttarhuset.
–Sjølve bygget på skiskyttarstadion kosta 1,2 millionar. Frå spelemidlar får vi truleg i overkant av 800.000 kroner. Resten blir fiansiert ved låneopptak, og no treng vi pengar for å betale ned lånet. Berre asfalten utanfor her kosta over 100.000 kroner, seier Nedreberg som er glad for at folk møtte opp på dansen.
–Vi har fått mange gode tilbakemeldingar. Mange minnast flakedansane som var på Tippasetra for nokre år sidan, og er positive til at vi no startar opp att med sommardans her på Harpefossen. Og sjølvsagt set vi pris på at folk vil støtte oss i arbeidet med skiskyttaranlegget her. Det er eit samarbeid mellom skiskyttargruppa på Stårheim og langrennsgruppa på Haugen. Eit anlegg som begge idrettsgreiner har stor nytte av, seier Nedreberg som også kan opplyse at nye planar er i kjømda.
Snøproduksjon og rulleski
–Vårt neste ønske no er å få etablert ei rulleskiløype tilknytt stadion. Og så ser vi gjerne at vi kan få til snøproduksjon, også til bruk i langrennsløypene. Dette er planar som vi snakkar om, men som enno ikkje er kome ned på papiret. Vi har heller ikkje vore i kontakt med grunneigarane, men vi håpar som sagt å få realisert desse to prosjekta på sikt. Dei som driv med skiskyting treng ei rulleskiløype slik at dei slepp å trene på trafikerte vegar. Dessutan hadde det vore greit å kunne trene samanhengande på kondisjon, teknikk og skyting også på den tida av året det ikkje er snø. Når det gjeld snøproduksjon vil ein sole med kunstsnø i langrennsløypa kunne føre til meir stabile tilhøve for skiføret, seier Nedreberg. Han understrekar no likevel at nedbetaling av skyttarhuset er første plan, og så får anna utvikling kome etterkvart.
Lys frå Malakoff
Arrangørane hadde gjort det triveleg på området kring skyttarhuset i høve dansen på laurdag. Heile området hadde dei sett gjerde rundt, og pynta med lyskjede, utlånt av Malakoff rockfestival. Frå Malakoff hadde dei også fått låne fleier toalett til bruk for kvelden. I sjølve skyttarhuset er det to toalett. Elles hadde dei pynta med levande lys på borda og blomstervasar med nyplukka rogn.
–Det var ganske mykje arbeid på førehand for å arrangere denne flakedansen. Men då er det enno meir kjekt når folk møter opp og kjem med positive tilbakemeldingar, seier Nedreberg.