Bakgrunnen for saka er styremøtet i Nordfjord Havn IKS måndag denne veka. Der var Sigurd Reksnes (SP) frå Eid einaste styrerepresentant som røysta for at Nordfjord Havn IKS skulle gå inn på eigarsida i SeaWalk Nordfjordeid AS.

I etterkant av dette møtet sende Eid-ordførar Alfred Bjørlo (V) brev til styreleiar i Nordfjord Havn IKS, Elisabeth Elliott, med oppmoding om å stille på formannskapsmøtet i Eid torsdag i neste veke, for å orientere om styret si avgjerd og svare på spørsmål frå formannskapet.

Meiner styreleiaren bør møte

Bjørlo fekk svar frå styreleiar Elisabeth Elliott i går. I svaret skriv styreleiaren blant anna at «Jeg finner det vanskelig å skulle legge opp til en praksis der jeg som styreleder skal delta på formannskapsmøter i de ulike eierkommunene for å redegjøre for vedtak som styret har fattet.» Dette reagerer Havnerådsleiar Nils Myklebust på. I ein e-post sendt til Alfred Bjørlo med kopi til Elisabeth Elliott skriv Havnerådsleiaren blant anna dette: «Som Ordførar i Eid er godt kjent med, så er det styreleiar som skal representere selskapet utad etter vedtektene. Det er derfor naturleg at styreleiar stiller opp på møte i Eid formannskap og forsvarer og argumenterer for dei fleirtalsvedtak styret har vedteke.Ynskjer Eid Formannskap etter ei slik orientering, at styreleiar også stiller på kommunestyremøte, så bør styreleiar gjere det.»

Ber om ny vurdering

Alfred Bjørlo er heilt på linje med Havnerådsleiaren sitt syn i denne saka.

– Eg deler Havnerådsleiaren sitt syn. Det har eg meddelt tilbake til både styreleiar og havnerådsleiar, med oppmoding til styreleiar om å vurdere saka på nytt, seier Bjørlo.

Nedanfor kan du lese det fullstendige svaret frå styreleiar Elisabeth Elliott til Eid kommune v/ordførar. Du kan også lese svaret Havnerådsleiaren sende til Alfred Bjørlo og Elisabeth Elliott.

Svaret frå styreleiaren

Brev sendt 18. august til Eid kommune v/ordførar frå styreleiar i Nordfjord Havn IKS, Elisabeth Elliott:

«Vedrørende deltagelse på formannskapsmøte den 25. august 2016

Viser til deres henvendelse datert den 16. august 2016 med forespørsel om min deltagelse i Formannskapsmøte den 25. august 2016. Bakgrunnen for dette er havnestyrets vedtak i sak 34/16 – SeaWalk Nordfjordeid.

Det er ønskelig at jeg som styreleder deltar i møte for å orientere om styret sitt vedtak, samt svare på eventuelle spørsmål fra formannskapet. Videre er det vist til manglende oppfølging fra min side i forkant av styremøtet. Dette mellom annet i forbindelse med å avklare et samarbeid mellom Eid kommune og Nordfjord Havn i et eventuelt aksjeselskap.

Jeg finner det vanskelig å skulle legge opp til en praksis der jeg som styreleder skal delta på formannskapsmøter i de ulike eierkommunene for å redegjøre for vedtak som styret har fattet. Hver kommune er representert i styret, og de enkelte styremedlemmer er nærmest til å informere tilbake til sin kommune om drøftelser foretatt i forbindelse med vedtak i de enkelte saker. Videre vil møteprotokoll fra møte være tilgjengelig, og det vil her fremgå en kort gjengivelse av de drøftelser som ble gjort i forkant av vedtaket.

Dersom det er misnøye med min håndtering av saken, herunder saksforberedelsene, mener jeg dette er en diskusjon som bør tas med havnerådet. Ordfører bør da be om at det kalles inn til Havnerådsmøte.»

Svaret frå Havnerådsleiaren

Dette skriv Havnerådsleiar i Nordfjord Havn IKS, Nils Myklebust, i ein e-post til ordførar i Eid Alfred Bjørlo, med kopi til Elisabeth Elliott:

«Viser til kopi av mail sent til Eid kommune v/Ordførar, frå Styreleiar i NH IKS Elisabet Eliot. Styreleiar har ikkje vore i kontakt med Havnerådsleiar i forkant av denne mail, men Havnerådsleiar har fått kopi av denne i etterkant.

Som Ordførar i Eid er godt kjent med, så er det styreleiar som skal representere selskapet utad etter vedtektene. Det er derfor naturleg at styreleiar stiller opp på møte i Eid formannskap og forsvarer og argumenterer for dei fleirtalsvedtak styret har vedteke.

Ynskjer Eid Formannskap etter ei slik orientering, at styreleiar også stiller på kommunestyremøte, så bør styreleiar gjere det.

Ynskjer vidar Eid kommunestyre eit møte i Havneråde etter at dei har fatta vedtak i saka, slik dei har rett til etter vedtektene,  så bes dette meddelt til Havnerådsleiar om eit slikt ynskje og då vil sjølvsagt Havnerådsleiar innkalle til eit slikt møte.»