Folketalet i Eid er pr 1. juli 2016 på 6.056. Eid har hatt vekst i folketalet på 31 personar siste kvartal, og 41 personar så langt i 2016. Det er ny folketalsrekord for Eid, og er også den sterkaste folketalsveksten i Eid i løpet av første halvår nokosinne.
– Svært gledeleg
Det syner ny folketalsstatistikk frå Statistisk Sentralbyrå lagt fram i dag. Folketalsauken i Eid i 1. halvår kjem både av fødselsoverskot og netto innflytting. Det er netto innflytting både innanlands og utanlands - altså fleire som flyttar til enn frå Eid både frå utlandet og frå andre kommunar i Norge. Eid har hatt folketalsvekst 11 av dei 12 siste kvartala i SSB sine målingar.
– Folketalsveksten i Eid er svært gledeleg, og er i tillegg avgjerande for å sikre finansiering av velferdstilbodet til alle innbyggjarar i kommunen i framtida, seier ordførar Alfred Bjørlo (V) i ei pressemelding.
Passerer Vågsøy for første gong
– Det er særleg gledeleg å sjå at vi blir ei stadig meir attraktiv kommune å flytte til. Med planlagde nye store næringssatsingar og pågåande utbygging av bustadfelt og fleire nye leilegheitsprosjekt i kommunen, ligg alt til rette for vidare vekst i åra framover, uttalar Bjørlo.
Eid har no også gått frå å vere den 6. største til den 5. største kommunen i Sogn og Fjordane, ved å passere Vågsøy i folketal for fyrste gong.
Folketal største kommunar i Sogn og Fjordane og Nordfjord per 1. juli 2016
Førde: 13.003
Flora: 11.975
Sogndal: 7.813
Stryn: 7.221
Eid: 6.056
Vågsøy: 6.043
Gloppen: 5.818
Bremanger: 3.855
Selje: 2.779
Hornindal: 1.197